Pasali su blagdani, već smo va noven letu, odmorili smo se od slavlja i nazdravjanja, od trošenja i trežnjenja, doduše kako ki, neki je novo leto dočekal z grdun gripičinun, neki va familjah, doma.
Kako sad vrimenska prognoza kaže, tek nan gre zima.
Pamete naši stari velu studen i poledice na se strani, snega bi znalo bit i do pol metra va zapuheh. Ledilo sej' i more uz paladu, zaledil bi se Potok. Znali bi se načinit brigi od leda, kako je voda spod tekla tako bi se naslageval led na led. Najprvo bi počelo "pušit" na Planine tamo oko Tića, pa bi burun nošeno preko umejki sloj po sloj nasulo strani Kotora, Sopajske, a grmi i jelvi počele bi dobivat zimski snežni kapoti. Lokva va Kavranovoj postala bi teren za hokej, šćapi od jasena, a šampioni crikveniška mularija. Zaprave je bilo lipo gljedat zi poneštar va teplen kako prši snežak se do obali, do mora i pokriva palmi va parkeh, barki va portu, cesti i kalu. Padalo je celi bogovetni dan. Crkvenica j' tad imela lipo svečano belo ruho, ko nevestica. Va vrteh bi špijali vrhi črnoga zela, ko je još jedino i bilo va vrteh i šempre smo ga imeli na stolu za obed uz praščevinu ili bravinu. Jila sej' jaka hrana, repa i kiselo zele fažolon, zaprave fažol na sto mod. Kompira sej' imelo doma, jušto za slučaj ovakove zimi. Tada se ni ni moglo hodit okolo, em ča je bilo jako mrzlo, na delo su oci hodili jako zabundani, a ribari su jedino imeli tepli kabani hodeć kontrolat barki.
Za nas dečinu je to bilo velo veselje. I ja se ko dite spametin na mrzlu zimu i veli sneg. 1956. leta, sneg je zapal preko noće, a našemu veselju ni bilo kraja, jadila sej' mat kad smo hodili van. Ni bilo ni dobreh postoli, samo rukavice i kapi, vunene čarapi keh smo bili dobili pod bor ko regali. Nazad bimo prišli zmrznuti ko sigi. I onda sej' delalo snješki, mesto nosa šćapić, mesto oč komadići karbuna, usta od kakoveh kamičići, na glave stari lončić. Ma smo se veselili a pod noson su se šmrklji do ust cedili. Na cestah bi se stazi ko na klizališču delale, a deški na guzice padali. Zeble su ruki i obrazi, na nogah se ledili prsti. Puno nas bi i ozeblini zaradili. Kad bi se vrnuli doma, najprvo bi se zuli, mokri ko miši valje stavljali robu sušit okol šparheta. Čaja je vavik bilo na šparhetu, oni fini dišeći lipov ili od šipka zaslajen nonićeven medon zi čelinjaka. Va rolu od šparheta vavik su bile dve cigli, teplelo jih se pa zamotalo va krpu i stavljalo va postelju prije nego bi se šlo spat.
Nono me je popeljal jedanput pokazat kako se ledi more uz kraj. Rekla bin bila „da sej' sad poć okupat“, a nono je rekal da san ćampava, sa bin se zaledila. "Ma ne bi mene bilo zima, šla bin ja nutar va kapotiću" - užal je nono pravit to ko štoriju.
Va Cikvenice postoje neki dukamenti o veloj zime i snegu. Tako monsinjor Rigoni bilježi va svojeh zapiseh, 1929. leto, pa 1939. kad je snega napadalo 40 do 50 centimetri a od vele zimi sej' zaledil i dugo ni otapal. To je bila najjača sječanska zima do - 17. A 1956. se i ja spamećujen imela san 7 let. Va zadnje vrime 2013., ku ćemo pametit po zaleđeneh i popucaneh vodomjeri, cijevi i velehštet, poli nas i okolice. I tada je poli nas bilo - 17 celzi. Nisu poli nas poznate takove vele zimi, bilo j' mraza i buri, ma ovakove se pamete i spominju ko najjače. Za takoveh zim život bi nan gotovo stal. Nisu delale školi, ni promet, stareji bi klimali glavami da toga još ni bilo i skrbeli se za krovi i kuće, ćel zdržat, a nami dečine na veselje, saka pahulja snega.
Va narodu je poznato nekuliko sentenci. Već od Katarinine - Sveta Kata sneg za vrata, prišal je sveti Blaž paj rekal daj' laž. Ko i ova - Bura fora se do mora ili - Takoj' zima, da će zec noćas mater iskat. Do Božića med, za Božićen led.
Videt ćemo oveh dani ča će se obistinit. Zima je, gremo va teplo.
Slike va prilogu su zi arhivi Slavka Matejčića.