Crkvenica večer - sliki su ke saki od furešti ki pride na odmor mora zapametit.
Pasujen od Črnoga mula od Saxa polešto laganen korakon i gljedan. Sax je destinacija va koj moreš pit kafe, natakat se birun, gljedat va barki vezane va mićen portu, da ne rečen marine. Zi stolice gljedaš mihače va bistrine mora, sunce zahaja va črljenen bljesku seh kolori kot jedna vela naranča. Zi negdanjega restorana na plažah čut je umilni glas Nine Badrić, milozvučan i za promjenu od muziki ku inače pušćaju melem za uho, a Nina onako šesna za oko.
Negdanji Zelengaj ko zi neke štorije o bogatoj baronese - zgrade rane secesije, ka se skoro ne vidi zi gusteh drv. Pred sobun gljeda va naštivani kažoti puni višalic i robi, plastiki, sakakoveh kramarij uvezeneh zi Kine ili Indonezije. Na levoj bande negdanji tenis teren, učini ti se da pok. profesor Banjanin špija zada drva i čudon se čudi čaj' pak tamo. Va šumice zada žice čepi sjećanje na mini golf, kulike smo ure tamo igrali, karali se i merili čija balica bolje cilja škulj i kuliko imaš punti. Barba Malinarić, ko da ga vidin va kućice, broji sitni dinari od naplati. Va plićaku se pljaska, šprica od vodi i veseleh muškeh glasi onesteh ki igraju picigin.
Pasuješ dalje, sveti novourejeni hotel Esplanade va noven ruhu, kot fini gospodin, pod šjarpicun. Voda va bazenu se bljeska, složeni su ligeštuli, svete svetla zi seh stran, lipo urejen zeleni okoliš, ni čut muziki. Terasa više neće služi za prvi tanci za domaći i stranci. Na plažah dječja vriska, vlakić fiče, na brodu Bounty neki novi gusari. Guštaju dečina na napuhanen gumenen gradu. Žuta gljiva pušća tešku muziku da ne moreš ni govorit. Dojdeš do hotela Miramare, od staroga vrimena ostala je samo fontana, menja svetla va bojah, ljudi se litrataju, kažoti prodaju kramariju. Miramare umira od muki.
Uz balustradu šetači, sa sila. Nikada više nego ovo leto. Ližu sladoledi, dečina se dreče, teču, opća gungula. Uz kuće restorani, zlatarne, sladoledarne, po kafićeh se toče kokteli, pivičini, vodi na litri. Konobari zmed stoli s tacami punemi jila i pila, prešno se provlače med kantridami, potni i umorni. Na saken koraku krozi park po klupah sede stareji. Gljedaju kako mladi med sobun ni ne ćakulaju. Saki ima pred sobun, oni ajfoni, smartfoni, tipkaju. Čudon se čude. Rada sede na klupah uz malu paladicu. Pogljed na porat je od onuda najlipši. Vetrić jih hladi.
Na trgu veli šušur. Ulični zabavljači, sača predstavljaju. Neki na štulah - visoki šćapi za hodit, pravi majstori, neki vrte oganj, tancaju, hitaju balice, čunji, stoje ukipljeni po nekuliko ur, delaju akrobacije na špageh. Sa sila ljudi. Crikvenica ni nikada bila puneja nego ovoga leta. Za sačiji gušt, zabavi kuliko oćeš. Veselo i živo.
Pada tepla letnja noć, va arije ozvanja muzika, smeh, dečji plač, pljesak za svirači i akrobati. Zi brodi ki se vraćaju zi Vrbnika i Šila, kanat – „O Marijana, slatka mala Marijana“, ku i furešti i naši rada zakantaju kad se smućeni od sunca i vrbničke žlahtini vrnjuju zi izleti. Vele su teplini, zi pločic na trgu žari se teplina, gospe mašu lepezami, muški kanotjerami taru pot. Dečina umorni od celoga dana va karocicah tonu va san. Crkvenica će bit budna još dugo va noć. Ne da se ljuden doma poć. Samo je jedan godišnji, samo je jedanput na leto desetak dani uživanja va suncu i moru. Dan gre spat, a noć je mlada, mladi misec nad valun čudo na se to gljeda.
Laku noć lipi moj grade, ako moreš spi, ako ne, ćeš va zime.