Crkvenicu je oveh dani pritisla vela teplina. Ne vredi više ona stara, med staremi reć užana, - nakon Vele Gospe prvi dažji i letu je kraj. Suncu je put se kraći, grozdove zreje, smokvi se suše, ulika se dažjon snaži i bubri, još malo i mlado vino će poteć, mladi te se ženit. Se va svoje vrime, malo drugačije nego negda, ma stare užance, srcu dragi blagdani ko ča je Vela Gospa, Mala Gospa ili Marijica, kako neki užaju reć - nete se ugasit.
Va Crkvenice sej' vavik držalo do Vele Gospe ka pride na 15. augusta.
Va vrime pred Marijinski blagdani okol Vele crikvi i Petaka užalo je bit živo. Ranen jutron još za škurini ženi i ljudi hodili su va procesiju zi Crkvenice put Triblja, Drivenika, Hreljina i Dragi se do Trsata. Celen puton sej' molilo i kantalo. Nogi su bolele, pune krvaveh žulji, aš su neki za pokoru hodili brez postoli, bosi.
Okol zavjetne kapelice Majke Božjoj na Trsatu palili su sveći, molili se i klanjali, nosili regali na oltar za zahvalu na ispunjenjenoj miloste. Molilo sej' za zdravlje, za sretan porod, sriću i ljubav , olakšanje bolneh. Neki bi prnesal zlatnu kadenu, medaljicu, neki sliku ili neč ča mu je srcu bilo drago. Saki je tamo šal nekun težinun na plećeh i va duše, molitvun va srcu a vrnul se spokojan, nekako blažen i zahvalan.
Već nekuliko let unazad obnovljena je procesija ka gre Crikvenicun od vele crikvi, se do cirkula. Na početku procesije gre križ koga nosi križonoša. Za njen dečina prvopričesnici i bermanici va beleh haljicah, svećenik i slika Majke Božje lipo urešena rožicami, nose ju na nosilah ljudi zi župe, ponosni vjernici ki se sten jako diče. Nakon sliki lipo je videt ženi obučene va crkvenišku nošnju, koristi zi obadve crikvi prate sliku crkvenemi napjevi. pa gracki oci z gostami okolneh mest, gradonačelniki prijateljskeh gradi i držav.
Vjernici nose va rukah zapaljene kandele a na usteh njin molitva. Lipo j' videt tu sliku, tu lipu užancu va slavu veloga blagdana. Trg se sveti od zapaljeneh kandelic, ozarene su i blažene lica vjernici zi celoga svita. To su naši gosti ki su se zatekli jušto va ovo vrime poli nas. Gradonačelnik biranemi besedami pozdravil seh prisutneh nakon čega je jedna divojčica anđeoskoga glasa otpjevala Ave Mariju. Velečasni blagoslovi seh prisutneh pa se polešto krene kantajuć nazad put crikvi. Lipa slika videt tuliko ljudi va procesije. Na liceh njin neka blagost i mir, stareji su kuntenti da su i ovo leto mogli poć va procesije. Dečicu matere i oci nose na rukah, da njin se ne umore nožice. Voze se i invalidi va koliceh. Cela procesija va zajedničkoj molitve. Vela crikva Uznesenja blažene djevice Marije na nebo, oveh je dani bila mesto hodočašća. Autobusi ljudi dolazili su va ovo naše svetište. Posebe je posjećeno trsatsko, Marija Bistrica i se mesta kade su Marijinska svetišta. Ki ni šal na Trsat,obavil bi mašu va našoj crikve. Poten bi se šlo na samanj ki sej negda protezal se od Petaka do stare Place (do Intera) a va novije vrime do naše vele place. Saki bi kupil kakovu sitnicu od drvenarije, užalo se kupit spletene rešti cesna i kapuli za zimu. Onu živost, cenkanje, hvaljenje robi, ni jedna placa ni samanj ne more zamenit. Dolazili bi i ljudi z okolneh mest. Saki je neč prnesal za ponutit, prodavat, a narod bi vavik neč zase našal. Zaten bi se užalo poć na pijaču, soki, na sladoled.
Veli je to i lipi blagdan, čovik mora va sebe vere imet, užanci štovat, a naša Gospa patrona Crkvenice će za na nas i naše lipo mesto - blagoslov poslat.