Umrla je va 95-ton letu žitka naša Teta Jelica Sridnja.
Prišvorak je nasledila od matere Marije ka je živela va sridnjoj kući i bila je sridnja od tri Marije ke su živele kuća do kuće i zato su ju Sridnja zvali.
Sama je živela i dočekala smrtni čas va materinoj kući i da ni bilo našega bivšega plovana Draga, ki ju je dogljedal i saki dan dolazil z Rike, ne bi joj imel ki dat žlicu vode na samrti. Istina je da je ona trejset let brižila o njemu, pa i onda kad mu je bilo najteže a bila mu je ko mat. Plovan Drago je Tribaljcen svojin primjeron pokazal kako se dobročinstvo treba vraćat dobročinstvon, a dobra djela ne sme bit zaboravljena. Bil joj je bolji nego sin i saki od nas bi takovoga sina poželel.
Ni Teta Jelica brižila samo o Plovanu nego o semu va našoj Crikvi i oko nje isto ko i o našoj plovaniji ku su naši pretki udelali za svoga Plovana. Tužna je bila Teta Jelica, ko i si mi, ča Plovan ne žive više va Triblju, marako su nan to obećali, a plovaniju su sad preselili - va Šekrestiju.
Naša Teta Jelica je bila Dobri Duh tribaljski. Za sakoga je imela lipu rič i utjehu valjad zato aš joj va žitku ni bilo lahko pa je razumela ljušku muku.
Ko da ju sad vidin i čujen njeji glas koga se med hiljadami moglo poznat. Sjećan se, ko danas, kad smo, z velikin zanoson 1966., va njezinoj kući pripravljai robu za mesopusnu kumpaniju, a ona je bila naš "spiritus movens". I tako sagdi.
Najteže mi pada ča je još jedno ognjišće va Triblju ugasnulo, a prazne su sad se one tri kuće s početka i čiji dimljaki više ne dime. Kad bi na ton baren stalo. Na našu veliku žalost neće aš je još va Triblju na desetke kuć z jednin ili dva starca pa će se ognjišća i ubuduće gasit - ko na tekućoj traki.
A plač novorođenoga diteta je vrlo, vrlo rijetka slučajnost. Se nas je manje - domaćih. A "karavane prolaze ".
Za tetu Jelicu želin širon oprte Rajske vrata i da se moli Dragon Bogu za Tribalj jer nan samo on more pomoć.
Tribalj, 29 svibnja 2018.
Žarko Gašparović Markun