Va Triblju i Kiriji je za me i za sakoga Tribaljca isto tako, centar svita i bliže i dalje okolice. I to ne onako ko ča su va Ludbregu (nadan se da tajsti toponim ni nastal od ludoga brega) narisali krug i rekli da je totu centar, nego je va Triblju centar svita kadi god zabodeš šćap va zemlju.
To isto vredi i za ostalih Vinodolcih bili oni va dolini ili uz more. Razlika je samo va ton ča on ki su uz more stave prst va more, a ostatak štorije je isti. Najžešće se toga drže Driveničani; valjda prema onoj uzrečici da se i otrov i lik va maloj bocici drže.
Zato me i fizički boli kad naši domaći ljudi, zbog potribe, gredu križen Svita trbuhon za kruhon aš jih tamo kamo pridu mordi čeka korica belijega kruha. A kad ga, i ako ga najdu, vide da je ta kruh „zaslajen“ stručkon od pelina i žalon za rodnin krajen, a za njimi, ovdi doma, ostaje praznina ispunjena jadon i čemeron.
Nisu bez razloga, nigda žene kad su jin muži zbog iste potribe šli va Sjevernu ili va Teplu Meriku, isti dan oblačile črne halje i pokrivale črni rupci ko da jin je umrl niki najmiliji. Nosile su jih se dok se nisu vrnuli doma.
Ne pitajte me kuliko tih „Merikani“ više nikada ni videlo ni Sopalj ni Diran ni Kozak. Z uspomenun na njih i na naše zeleno polje su živeli celi žitak, a kosti su jin ostale va ton hladnon ljuškon svitu, hladnon makar bil i tepal.
Tajsti osjećaj je ostal zabilježen va starinskoj našoj pismi:
„Lipo naše zeleno Primorji, oja oj rožice moja fijolice moja,
Po kon šeće milo drago moje, oja oj rožice moja fijolice moja ...“
Tako je bilo i mojen ćaći staron koga moja mama ni nikad videla, a hladan pot me oblije kad pomislin da bi se slično moglo dogodit i mojoj dragoj hćeri. Ni moj ćaća bez razloga vavik govorel: „Pod svojun voltun se najslaje smije i najlaglje plače“.
Kirija
Naši stari su vavik divaneli da je Kirija od Krešišća do Novoga pa je tako Tribalj za nas ne samo centar Svita nego i centar Kirije. Samo Novljanci ne bi oteli spadat va Kiriju aš jin je, valjda, ispod časti da jin ime potiče od kirijaši ali bi mogli i oni, kad do njih pride spoznaja o mogućnosti da je naziv Kirija prišal od grčke riči Kyrios ča bi se reklo - Gospodin, priko noći ko i Kotorani, postat Kirci.
Moja pokojna punica Mica Car – Fanka r. Košuljandić, po materi Katnić, znači Kotorka i po materi i po ocu, živela je 98 let od čega priko 40 let va našoj familiji i nikad ni rekla da je Kirica. Vavik je divanela da je ona Crkveniškinja ko ča to divani i moja žena, hćer od ribara Ivana Cara – Nanda.
Crikveničani su za nas Kotorani bili i ostat će ko ča su to i za sih svojih susedih, za Svetojelenci, Selačani, Bribirci, Grižanci, Driveničani, Jakovari i neka jin to služi na čast, aš ta naziv još od rimskih vrimen potiče od grada, ščin se malo mest na svitu more podičit.
Meni ne bi smetalo kad bi mi rekli da san i ja Kotoran aš je moja praprastara mama Jela r. Car bila prastrina Josipu Caru zvanon Pepe Fraka nigda poznaton crikveničkon pilaru z Kale.
Hipoteza o Kyriosu - Gospodinu ko izvoru naziva Kirija je malo vjerovatna aš bi onda Rimljani mesto Vallis Vineariae napisali Valis Dominis, a va mnogih naših glagoljskih listinah od Vinodolskog zakonika naprvo (bilo bi jih i puno više da naš lokalni Herostrat, patološki zaljubljenik va latinski, plovan župe Belgrad i župe Grižane Franjo Vrinjanin z Senja, ni zapalil glagoljašku arhivu tih dvih plovanij) ne bi se spominjal Vinodol.
Druga štorija za ku ja znan je da je Kirija dobila ime po Sveton Quirinu aš da je štovani toga sveca bilo jako razvijeno na Krku. Ako je tomu tako zač se onda Vrbničko polje ne zove Kirija.
Istinabog postoji va Gašparovićih va Triblju toponim Kirin i legenda da je totu nigda postojala crikvica posvećena tojstomu svecu, ali je nevjerovatno da bi to moglo bit uzrok za imenovanji cele doline.
Najvjerovatnije je Kirija prišla od tursko arapske riči - kira - ka znači najam, ča je z vrimenon upotrebljavano i za najam zaprežnih kola ke su vukli voli ili konji. No bil izvor riči Kirija va Gospodinu, Svecu ili običnoj kiriji, ja ponosno nosin ime Kirac (moren i parafrazirat Gorkovljevu izreku: „Kirac – kako to gordo zvuči“), a usput rečeno, poli nas se za lenčinu pejorativno govori da je - gospodin.
Drugi put o događanjih vezanih uz Kiriju i Kirijaši (z velin slovon).
Tribalj, 2.5.2019.
Žarko Gašparović Markun