Zadnji su dani marča bili lipi, tepli, čak je i treta marčena bura bila kratkoga daha valjad sej' pušuć va svoji tri rogi, tancajuć na svoji tri piri, jako zmorila pa sej' brzo kalmala. Zateplilo je, jutra su još friška, maglovita i rosna. Zadnji skosi zimi su pasali. Nebo nad valun je jasno kot zrcalo, modro kot fijolica, a mladi misec se ogljeda zvezdicami ko da njin se korteja. Ma najsjajnija zvezda na na kupu zvezdi - Veloga medveda - tako jasno blisiče da mu ni blizu ne da. Kad jih pogljedaš čini ti se kot da jih rukun moreš ćapat.
Kad se jutron probudiš, opreš poneštru, tičice kantaju, kosići je čut ča preleću propupale grani i grlice je čut kako grličaju ča pridu po mrvi kruha va padelice spravne za dživi. Tako je mirno jutron, ni čut niš osin tičjega kanta. Jutros je prva lastavica preletela po zraku, za njun te se druge. Zrak diši, po moru, po sole, po slaju od meda, po ranen jorgovanu. Se se budi zi zimskoga sna, i medvedi va brlogu, srnice breje, čekajuć lanad, va jeloveh šumicah pasu tek proklijalu travicu.
Prišal je travanj, ča mu ime kaže, travnati misec. Na poljeh već šenica jača svoji koreni i zelene vlati za kruh naš svagdanji. Rike i potoki grgoljaju, slapi su puni pa se okol sebe škrope, vodun se rashićuju. Kapljice se va hiljadu kolori na suncu blišće, zec skače šumun, gloje mladi pupi na kiticah šedrki. Radost se čuje zi mladeh grl mladići i divojak po umejkeh puni životne mladosti i radosti. Va srceh ljubavni zanos, krv te njin zavret, smutit glavi ovo travanjsko sunce. Plest te divojčice venčići od poljskeh rožic, pa ko vili zi gore na prvoj livade zatancat, kolo zaigrat. Tice slave piri, svijaju njazla za jaja nest, veselo vrsadu stresaju, kako i va prirode i mladost svoga para išće, za na jesen kad zazimi da se jedno z drugen stišće.
Čovik je lagak, hitil je zi sebe teški kabani i kapoti, tešku zimsku robu. Ćuti se kot pero, poskakuje pun volje za delon, vredan, vesel. Dečina se igraju na ćapeva, skaču preko lastiša, matere njin liče oguljene kolena, črljene se lišca, pot se cedi od teknje. Još je jedna zima za nami. Listaju mlade maslinove grani, pune soki čekaju radost Cvetnice kad te bit pokidane, opletene i na blagoslov odnesene.
Menjaju se stranice kalendara, prognozira se vrime. Pučki kalendar kaže da će travanj bit pomalo oblačan, vetrovit pa će malo zahladit, a zaten dani te već ugodni i tepli postajat. Ma ča moreš lipše poželet. Se će tako brzo proletet, i maj će prit, i jun i jul i teplo leto. Još niš ni zaustavilo meni misečeve ni meni vrimena, ni plimi ni oseki, ni obrtanje stranic kalendara. Se va svoje vrime, čoviku na radost, čoviku na pomoć, pa će tako i dalje bit. Veselimo se, aš vrime gre, pa stane, pa jopet gre va cirku brez konca. Zato sanjajte noćaska kako tečete livadami, radosni. Veselimo se još jednomu travnju ki je pred nami.
Jedna starinska, za onesteh ko ovi dani pobiraju šparugi: ŠPARUGI VAN - ZMIJE VAN, pa čuvajte se.
