Proliće se pomalo spušća nad usnuli umejki, lešice i njivi. Zimun se zaspi, ni pupi nit listi, gole grani i stabla smokav, orehi, črešanj i sliv, goli su i sivi. Ma pupi samo ča ne ziđu zi svojeh košuljic i procvatu prvi cvetići. Menduli i cibori su prvi procvali, oni već krase vrti, mame slajen čelice i tako lipo diše. Sunce grije ozgora i tira još mrzle magličaste jutra, nad moren se rastežu oblačići pari, barki su već na štacijah, love se marčeni lignji, bubre ljigavi zajiki kamenic ke su sada najbolje i najdeblje, posebe okolo Josipove.
More nuti zdravu čistu ariju prvemi ljudimi i pasami ki šeću obalun. Maćuhice kot od veluda najlipši su ukras našeh parki va vo vrime. Lipe sliki, lipi litrati, tičice kantaju pari si išću. To je ona najlipša slika pramalića.
Vrti i njivi čekaju na vredne ruki stareh non i mater da k zemlje pridu. Oci su već orezali trsi i voćki, grabljami pograbljali veje i suhore, važguju ognji a dim se polešto proteže nad zajmami. Danaska te počet kopat, sused će susedu priskočit pomoć da se delo prije fini. Noni će va košeh zi gmili i štal gnoj nanest i po skopaneh lehah rastrest. Koši veli, plašćenicun - oprtun okolo ramen zavezane a hrbat se grb pritišće od težini, ni ženan lahko. One te motikami rastrest balegu po skopanoj zemlje grabljami pograbljat i gredice načinit. Već va marču prvo te seme va zemlju klast, zasadit kapulicu, poset salatu, radić i sakakove verduri već kad njin doba pride. Znaju naše noni već naučeno delo, naučile su naše matere bez recipisi saki zna svoje delo.
Dok su ljudi po poljeh, matere se brinu o dečine, kuhaju marendi za težaci, starinsku prežgani juhu, panadu, prontaju feti dišećega friško spečenoga kruha. Pripravit te i bevandu da se muži okrepe, zdeli i padeli, žlice. Ponest te va košićeh na polje da se malo osnaže i počinu. Pa gredu dalje.
Veselo j' na njivah, jedni drugeh preko mej od gromač nazivaju. Znaju da će ta zemlja oko ke delaju dat lačnemi ustami hranu, blagu seno, žejnomu grlu vino i voćki dečine. Lipo je pojist domaće, veselit se uz vino, zakantat te celen guton noseć lopati i vili vrnjujuć se doma utrujeni i žuljevitemi trdemi rukami pogladit dečje glavice i kuntenti pogljedat va ženi. Kada fine delo, pride vrime da se na more gre, još za škura ribi zasakat. Takovo je življenje.
Teško je bilo našemi staremi nadelali su se oni, odhranili dečinu. Ženi bi i na placu ponesle plodi zi svojeh gredic, prodat i ki živi solad zaslužit. Dečine za postoli, za ono malo robi ča njin rabi. Ni bilo raskoši, živelo sej' skromno. Moralo sej' imet ki solad za nedaj bog bolesti i dohtora a za drugo bi se snašli. Kozice i ovčice davale su mliko, letuće blago jaja i meso, rohćali su prasci va koceh, za pojist i preživet sej' našlo.
Truda i teškoga dela ni falilo, ma bili su kuntenti onen ča imaju. Breme života j' bilo teško, teže od one košari i motiki z kun su se naši stari vraćali svojoj matere hraniteljice - ZEMLJE.
Svojoj vere i crikve i zahvale Bogu da te i ovo leto imet za preživet, da će se na njihovo teško breme pozabit.
Aš vredi ona stara - prazna vrića ne stoji po zgoru.
