Va ovo zimsko vrime pred Božić, puno je lipeh dani ki vesele i staro i mlado. Šesti dan va dvanaesten misecu štuje se Sveti Mikula, zaštitnik mizerneh, dečine, pomorci i ribari.
Tomu smo se danu negda mi dečina najviše veseleli. Oglancali bimo postolići, nadajuć se kakovomu skromnomu daru, snenen okon špijali bimo put poneštre, da bi videli Mikulu, dok san ne bi zaklopil oče. Mikula ne bi pozabil nikoga, a ona šaka orehi, mendul, smokav, ka god jabukva, daj Bože naranča, bila j’ najlipši dar ki si prijel.
Kako su dečina više od sega htela videt Mikulu, kakov je i kako zgljeda, va familje bi on k večere prišal va kumpanije z vragon-krampuson, ki bi rošćal i rakamaral pod poneštrun lancami, da bi ti se gaće tresle od straha. Pital bi dečinu sul bili dobri i poslušni i dal njin za pokoru za njihovi mali grihi zmolit ki Oče naš ili Zdravo Mariju. Podelili bi dečine dari i šibi i pasal va susedstvo, a vranić bi rošćal da bi se se prašilo.
Jedno vrime Mikula j’ hodil okolo skrivoma, aš je bilo "drugo" vrime, pal je va nemilost, pa bi dečine prišal Deda Mraz. Par let nismo znali komu će ki prit, ma bi nas nona isto naputila da stavimo postol va poneštru. Sad je Mikula znova prišal na svoje, samo se j’ sledić "moderniziral". Dečina mu pišu pisma, želje su malo veće i skuplje, on pride va vrtići i školi, sobun pelja dva, tri vranića, aš su dečina valjad zločesteji. Strah valja, dečina se stišću uz matere ili noni, ma kad vide oni tepli, dobri pogled od Mikuli valje se umire, i otvaraju dari.
Na puno stran, ko i va Rike kade se Mikula štuje kot zaštitnik pomorci, gredu procesije noseć njegove sliki i moleć se za dobro more, zavećuju mu se za spas od nevere. Neki stareji znaju pravit dečine, kako je onput živel jedan mizerni čovik ki ni imel soldi za oženit tri hćere, pa mu je Mikula, ostavil za saku hćer va poneštre vrićicu zlatniki. Odonda se i slavi taj dobri biskup ki je za svoja dobročinstva ka je udelal, proglašen sveten. Kako bilo da bilo, Mikula će prit i vo leto, zbudite va sebe ono miće dite od negda, naputite dečinu da i večeras va poneštru stave postol, stavite ga i vi morebit će i vami Mikula čagod prnest, ako ste bili dobri.
Ovo pročitajte onemi najmlajemi, morebit njin se dopade:
Ki to tapa, ki to gre
va belen kapotu
Belun svetun kapun
i srebrnen šćapon
Smehon na obrazu,
dobrotun va oku
Si deca već znaju
tog dobrog čovika
Radosno ga čekaju,
malo j’ do Božića
Dari dobroj dece nosi,
krampus za njin praši
zločestu dečinu
on lancami straši
Onom ki je dobar,
puno lipih slašćica
a ki je nedobar
pozlaćena šibica
na poneštre čeka
oglancana čizmica.