Va našeh krajeh postoji puno štorij ke su se prenosile z kolena na koleno, a pravili su nan jih naši stari. Tako i ova štorija od bure ku bin otela z vami podelit da se ne pozabi. Bilo je štorij i o Maliku, Švaroziću, Maciću, Macmaliću pa i zmaju i šumskemi duhami i vilami.
Ovo van je štorija o bure. Po goleteh stran na škriljcu Velebita va staroj kuće okružena glogon i retken biljen živela je jako stara starica dugeh beleh vlasi, zvali su ju Bura. Suha kot bakalar, na njoj sama kost i koža. Strašili su se ljudi te spodobi od ženi. Kad bi se onako raščupana i grda spustila va selo, si su bižali od nje i skrivali se po kućah. Najčešće bi sedela pred svojun kućun, uzdisala va svojen jadu a njezin sej' dah mrzal i jak, spušćal prama moru lomeć pred sobun drva da bi se grmi stiskali i cvileli, da bi ju ljudi strahon slušali.
Spušćala bi se ona do mora kade je vladal njeji brat Vihor. Zajedno su dizali vali i prašili njihove bele kresti i penu put školja, ko bjesni konji poorali bi i zamutili more. Zmorila bi se starica Bura, nakon par dan vrnula se va svoju trošnu kuću, odmarala se kratko pa kad bi smogla snagu poharala se pred sobun puten do mora i kamik i bilje se do korena. Taman se za njejega sna se pomalo refalo i zazelenelo ma njoj je ta lipota smetala pa bi znova šla delat zlo. Burin se uzdisaj jopet pretvoril va gordi vetar. Udarci vetra opusteli su polja, vinogradi. Siroti seljani plakali bi od muki i proklinjali Buru - Vražju buru.
Kroz selo je paseval neki siromah, lačan i nemoćan. Ljudi bi mu davali hranu i družili se šnjin. Pravili mu kakovu muku imaju z Burun. On njin je dal jedan savjet kako te se Bure rešit. Kad ona krene prama moru, rabilo bi njoj zrušit kuću. Bez kuće neće imet kamo pa će poć ća zi njihovoga kraja. Tako se i dogodilo. Bura je zvala na pomoć brata Vihora, sedela na razvaljenen starun kulun. Tamo je ona ko mlada i lipa divojka zavolela šesnoga mladića - kneževića. Knežević je zavolel i oženil drugu divojku a ona se razočarana pretvorila va zlu staru nagrišpanu staricu Buru.
Kad se Bura natulila i ziplakala, brat Vihor ju nagovori da se vrne va staru kućU. Kad ju je videla onako razrušenu još je više poludela i zmišljala najgoru osvetu. Osvetila se krasu, poharala se bilje ma se tuliko zmorila da se zavukla va jednu duboku provaliju i tamo zaspala. Tamo bi dugo spala a kad bi se probudila jopet se stala, okol kuć urlikala, crepi trgala strašila žene i dečinu. Kad bi se umorila jopet bi se va špilju skrila do drugi put jopet na svoj zločesti pohod šla. Nanovo se se refa, cvet procveta, drva se opet šla delat nereda. Ljuden pakostila, kući rušila se zimlatila uliki, smokvi, grozje, blago potrla, barki potapala, se od čega su ljudi živeli. Tako bi sako malo zapuhala, a o njejoj se force pravilo.
Ovu san štoriju čula od moga nona. Znali su stari pravit sakakove zla ča je Bura udelala. Ti vetar rabi rešpetat, aš nikada ne znaš kuliko će jada va sebe imet. Zato čuvaj se bure aš zla nan dela, svojun metlun se pred sobun pometa, lomi i sakomu smeta.
Vražja je ova bura.