Jutren ranen budnica pleh muziki probudila bi još sanenu Crkvenicu.
Hodila je glazba lipo ofeštirana va svečaneh odorah, marširajuć po taktu. Zdušno su puhali va svoji štrumenti predvođeni kapelnikon gospodinon Matićen ki jih je i učil svirat. Hodeć obalun pa po Tomislavovoj lipo jih je bilo čut. Otvarali su ljudi plušijani i pozdravljali jih mašuć zastavicami. Na zgradah miće zastavice, a Općina posebno urejena, na seh važneh zgradah Vijećnice, Suda i puno kuć usput klatile su se zastavi na vetru čineć jednu posebe lipu sliku. Rašteli su bili urejeni dan preja, mlade divojki su jih kitile cvatućen jasminon i jorgovanon, črljenemi šipkami. Par dani su se prale cesti šmrkon zi vatrogasneh auti. Se je dišalo na friško pokošenu travu. Va zraku sej' ćutilo svečano i blagdanjsko ozračje. Po auzlogeh su bile naljepljene hartene trobojnice i črljene proleterske, paroli -
Živel 1. Maj! ili Živel praznik rada - bila je obavezna dekoracija.
Po stableh plakati za prvomajske trki na štadionu. Prvomajske trki su va ono vrime bile tradicija i najvažnije dogajanje va Crkvenice.
Vinodolska ulica je bila puna ljudi. Si puti su peljali na štadion. Saki je otel videt svojeh omiljeneh motoristi. Arija je dišala na benzin i špirit, pred garažami su se glancali motori, mehaničari kontrolali makini. Pleli su se tuda vozači Regvart, Kralj, Medved, Klemenčić, Kurilenko, a kad bi prišal Mika Šnjarić si su pljaskali i navijali. Njegov crljeno - belo kockasto urejeni motor i njegova kaciga, kožna jakna, dečina su se rivali za dobit autogrami, a malo stareje divojki su se namešćale da se dopadu vozačami. Teren je bil pripravan, drvenemi grabljami ziravnan, trava se zelenela. Na štartu se pripravno. Nategnut lastiš. Sudački stol opremljen medaljami, pokalami, venci od javoriki za našeh heroji. Svečana tribina spravna za gradski dični ljudi, seh direktori hoteli i uzvanici. Već nakon obeda si su prešili nać bolje mesto uz ogradu na skalineh, ki je imel kartu šal bi nutar a drugi su na škamljicah ili dekah sedeli po stranah put Kalvarije i Benići, se sej belilo od beleh stomnj aš za praznik rada rabilo sej svečano obuć. Na samen štartu zagrmele bi makini, digle bi se prve kola, napeli se ko konji. Dizala sej vela prašina, bele stomanje postale bi blatne. Zrak je bil nabijen navijanjen, oktanami i mirison špirita. Na staze prava batalja ki da se bolje plasira. Naš je Mika puno puti vozil počasni krug okićen vencin javoriki. On je bil heroj našeh prvomajskeh trk.
Svečano sej' slavilo praznik rada. Malo je ki delal, slavilo sej' na se strani, okretalo janjci po staroj užance, svečani obedi, kanat i veselje. Ni se delalo nego svetkovalo.
Danas su to samo blede uspomene, ženi po dućaneh delaju da jedva dospeju skuhat obedi. Jedino još penzići ki se susreću na Tribaljsken jezeru, tamo ima i pjesmi i tanca. Na se strani kuha se poznati prvomajski ukusni fažol. Deli se narodu. Ljudi gredu na svoje vikendice va Bribirsku šumu, na školj, roštilja se i morda ki od njih prebire i sjećanja na negdanji - 1. Maj. Spamete se našega Miki i filma " Sjenka slave" z Mihun Balohon va glavnoj uloge. Trki se voze po našeh cestah na skupeh mašinah, ni više okićeneh rašteli i ni dišeće arije. Taj biš dan užival a drugi dan va nove radne pobjedi.
Živel, živel 1. Maj praznik rada i ljudskih sloboda i prava !