Od aktivnih crikveničkih darivatelja krvi Siniša Tomašić je na čelu liste sa 134 darivanja krvi.
S obzirom na to da je napunio 63 godine, a nema zdravstvenih problema koji bi ga priječili da nastavi s darivanjem krvi moglo bi se dogoditi da dođe i do brojke od 150 darivanja. Ali, o tom potom, u ovom našem predstavljanju članova crikveničkog Kluba 100+ crikveničkih dobrovoljnih darivatelja krvi Siniša se prisjeća svog prvog darivanja:
- Bil san još šegrt va ondašnjoj „Automehanike“ kad je bila organizirana akcija darivanja krvi. Moj majstor Mihovil Mavrić je rekal - ala mali odi s namun i tako san ja šal da ću dat krv. Ali, prvi put su me odbili jer još nisan bil punoljetan, ma su mi sejedno dali marendu i to samo pol šnicela. Šalili su se da je to zato jer san pol čovika i da niman pravo na više, ha, ha…
Drugi put kad san napunil 18 let šal san davat krv, a davalo se je va „Interu“, bilo je sve u redu i do sada se ove leta redovno dajen krv.
Zanimljivo je da je moj otac Mijo Tomašić bil va onoj skupini ka je prva organizirano počela davat krv va Crikvenice, mislin da je to bilo 1959. leta.
Bilo je još dosta zanimljivosti vezanih uz Vaša darivanja krvi?
- Je, bilo je, a možda najzanimljiviji događaj je bil kad san delal ko vozač hitne pomoći i kad san dopeljal jednoga pacijenta na hitni trakt va ričku bolnicu. Dok san čekal da obavi ča ima, došlo je do neke hitnoće i kolege su me zamolili da otpeljen doze krvi na ginekologiju. Kad san preuzel doze, na jednoj san pročital svoje ime i tad san bil toliko ushićen da to ne moren opisat. Tad san točno videl ča znači darovana krv.
Nekadašnji ste poznati crikvenički nogometaš, spomenuli ste da i tu imate zanimljivu poveznicu s darivanjem krvi?
- Igral san nogomet va vrime Zdenka Ivančića, Bera Gašparovića, Darka Cara Pamprle, sad pokojneh, onda Marijana Briškog, Ive Domijana, Nikice Zoričića, Ivice, Mata i Stipe Matejčića i drugeh. Bila je jedna akcija darivanja krvi kroz šetemanu, a potrefilo se da smo zapolne imeli kup-utakmicu protiv „Rovinja“. Dobili smo 2:0, Zdenko i ja smo dali goli, pa je ispalo da san isti dan dal krv i zabil gol, ha, ha.
Što Vas motivira da darujete krv?
Motiv je k'o i kod seh drugeh – da moreš nekomu pomoć.
To mi puno znači, a isto tako i potvrda da dokle god moren dat krv da san zdrav, to mi je nekakova kontrola.
Kako gledate na darivanje krvi nekad i sad?
- Nekad je bilo puno više druženja darivatelja, bili smo nekako više povezani, hodili smo na sportske igre na keh smo imeli puno uspjeha, posebno va nogometu. Danas je toga manje, ali me veseli da dolaze mladi ljudi ki se uključuju va akcije i daruju krv. Se pohvale ravnateljici Ireni ča je davanje organizirano va dve grupe, sad više ni gužve i se se lipo obavi.
Do kada namjeravate darivati krv?
- Ne razmišljan o tomu, dokle buden zdrav ću davat krv, a verujen da ću doć do 150 darivanja. Da se je prije va letu davalo krv četiri put, imel bin i 200 darivanja, ali nisu brojke važne. Važno je da je krv ku darujete stvarno nekomu od životne važnosti - to je ono ča me ispunjava.
I. Šubat