Okolo šparheta


Negda sej' živelo skromneje, nekako više skupa, va kuće nekuliko generacij, nono, nona, mat, otac i najmanje troje dece, a znalo jih je bit i više. Stareh se je posebno štimalo i poštivalo. Nono je bil glava kuće, nona ministar za financije držala je buštu soldami dobro hranjenu daj' samo ona znala kade je. Mat je bila glavna gazdarica - ministrica za poljoprivredu i stočarstvo, za odgoj i obrazovanje skrbela je okol blaga, kuhanja i odgoju dečini, nono je nastal delo oko kuće, zidariju - ministar graditeljstva, a otac je delal va državnoj firme i skrbel za živi soldi, on je bil odgovoran oskrbet familju. 

Familja je bila kot država, ministar do ministra, saki je svoje delo znal i delal i se je štimalo. Zasjedanje sjednice je bilo va veloj kuhinje. Va sredine veli stol, okolo osan stolic. Lipo urejeno, prekriveno tavijolon, nasred stola puna zdela jabukav i saki sej' mogal okrepit. Se sej' rešavalo pravedno i saki je imel ča mu rabi. Va šparhetu gori oganj, mat kuha, vavik nekuliko padel aš je familja bila vela. Brati još teku po dvoru - spadaju va onesteh ča gredu na zasjedanje samo kad je obed na stolu, da se ima ča zet. Zi peće diši domaći kruh, nona sedi na škamljice uz peć, sako malo dodaje drvo va šparhet i prebire očenaše. Nono čeka na stolice poli vrat i gljeda va najmanju sestricu va kolke ka blaženo spi. Si čekaju na obed, a kuhano črno zele diši va padele dok mat friga ribi. Petak je i rabi jist posnu hranu. Nonić se toga ne drži, on voli da se va maneštru hiti malo praščevini bil petak ili ne. Stareja sestrica slaže pijati na stol, vadi jih zi vele kredence. Va kredence lipo složena staklenina, police urejene mirlićami, kad se opre zadiši po čistoće. Na vrh kredenci bušti, jedna za muku, druga za cukar, kafe, črljenu papriku, papar. Se va jednen lipen redu kako i rabi bit. Kad sedu za stol, tepli kruh diši, sakomu jedan kus, semi jednako. Nono zimlje prvi, kuntenat je aš je bravini va zelu. Bit će komad za njega i za oca, za seh drugeh ribi. Zmole očenaše i mučeć jidu. Slatko srču, čuju se samo žlice i vilice. Sretni da i danas moru napunit lačni štumig. Mat ni ne sede, seh dvori, hrani najmanju sestricu, nona hvali jilo i pazi da ostane za oca ki će kašnjeje zi dela prit.

Složna familja gre naprvo, si svoje delaju, bez prigovaranja i borbi za bolje mesto. Saki zna ča mu je delat. Složna familja kuću gradi, kuntenti z onen ča imaju - skromno i se gre naprvo. Tako bi rabilo bit i danas. Prošlost nas uči kakova bi trebala bit sadašnjost. Sretni i veseli bili, dragi moji si.    

Podijelite