Leta su nan se tepleja i suša, daž ni padal puneh četrdeset dani, a suša je prnesla puno nevolje, prirode, blagu i ljuden. Suha raspucana zemlja, na njivah suncokreti prignuli glavi, hrmentun ni dospel ni sazret, suhi klasi šenice klate se na poljeh Slavonije, naše matere hraniteljice, žejno blago po školjeh ugiba brez vodi, ni ni sočneh vlati trav, osušile se uliki ko požmareni ucvirki. Kamik puca od silne žegi i vrućini, usahnula travica po umejkeh i pera na kitami.
Naši bi stari užali reć - nevolja nikad ne pride sama, za zlo ne rabi Boga molit. Nemar čovika, iskra zi tračnic vlaka, jedan blisak munje ili zlo va glave munjenoga čovika, hićeni ćik zi vozećega auta. Dosti je da se zapali veli oganj ki se za sušnoga vrimena širi ko pošast. Oganj se širi pred sobun se pali, gore stoletne jelvi, hrasti i glogovina. Još kada vetar zapuše ko čaj' naša bura, ko plamenen bičon oganj put kuć tira. Va velen su strahu ljudi za svoje dobra, blago, kući.
Zdavni ni bilo ovakovoga ognja ča je zadesil naš kraj, naše Selca, našu lipu Crkvenicu do Novoga, za zlu nevolju od čovikove ruki. Ma nikad ni bil čovik bliži čoviku, si su stali va obranu, dali svoju ruku da se oganj ukroti i zagasi. Pompjeri-vatrogasci zi seh stran zi bliže i dalje okolice prišli su va pomoć.
Nikad nećemo pozabit njihovu velu i kuražnu batalju vetron i ognjon, mladići skoro goli, muži pilami, potni od muki i suzneh oč od gustoga dima kij' grizal oče. Grdo je bilo čut zavijanje siren zi vatrogasneh cisterni, steglo nan sej' va grlu od skrbi za sakoga ki je bil onde zmed ognja i buri. A bura se jače puše, nosi se pred sobun, pali, šiški ko miće bombice odskaču od jelvi pa se zapali novi manji oganj.
Činilo sej' tomu ni kraja. Dim se proteže niz strani Barbare put Selac niz strani Ladvića, put Guljanovoga dolca, put Šuper, spaja se oganj z nebon, stareji su puni brigi do kuda će se proširit. Ljudi su na rubu snagi, cel dan i noć do drugoga jutra. Kad je bura kalmala, zrakon su doleteli eroplani natankani morskun vodun zi konala. Tri kuražni deški va "kanadereh" naši heroji z neba, svojemi manevrami tako su siguro i točno hitali vodu baš kamo rabi.
Ugašen je oganj, kalmlala j' bura, va srcu žal, ostal je samo goli krš i kamik, debeli sloj sivoga popela.
Od veloga ognja na Kotoru, na stranami Sopaljske, nekuliko manjeh, naši stari ne pamete većega. Kada je pal prvI daž, arija je vonjala tako grdo i spamećevala nas i na nesrićnu Kornatsku tragediju na brižni stradali ljudi. Kuliko let rabi da se tuga za stradalemi utiša da ozelene umejki, vrti, vinogradi, čovikovun zlun srićun nastradali.
Čovik bi rabil vrnut prirode ča je zel, zasadit totu na stotine maslin i odužit se za svoj grih, za svoju nesriću.
Ovaj je tekst napisan nedugo nakon veloga požara 23.7.2012. ki je zadesil Crkvenicu.
Ne ponovilo se, saki od nas pomisli i suosjeća oveh dani z Dalmacijun, Spliton i otokami. Strašna tragedija. Jopet velo hvala vatrogascami, vojske i narodu ki je stal va obranu svojega kraja.
Ne ponovilo se!