Maškare zimlju maha. Meštar je od gradonačelnika preuzel ključi grada. Sad meštar vlada, pravdu kroji, ma niki ga se ne boji. Gre po zabavah svojun časnun svitun, lipe ženske gljeda, nagrade njin deli, malo po pravice, malo po protekcije. Ma nima brig ča se tiče kraljice. Meštar Toni v Rike, sako letu novu ima, va toj veze vavik se štima, malice su šesne i lipe, va njimi bati maškarano srce. Da naš Toni i benificirani staž ima, va penziju neće poć, aš je pravi meštar junačina, ko da je Durrasel baterija.
Poli nas se sviti menjaju sakeh par let, još od vrimena meštra Antića promenila jih se sa sila. Ma ni loše malo drugačije vladat, saki svoje prnese pa j' bar lipša parada. Od vrimena kad su maškare pod murvicun tancale, zeble na bure i kuhanen se vinon teplile, duralo je to dok ni prišla nova maškarana snaga.
Maškare su se teplile po hoteleh, o njimi su se skrbeli ugostitelji. Va Miramaru su bile zabavi sjajne. Šile su se lipe vešte, fine svilne, prave. Tancalo se i veselilo i va Sokolanoj. I tamo su hodili mlaji, omaškarani, svirali su ondanji bendi, kantale domaće snagi. Formirale su se nove maškarane grupi poli Kalumice i Braca Istrijana na vrhu Kali. Jokeri su si ime zibrali. Jokeri su 1962. prvi na Korzu va parade prošli kad je sega šest grup dohajalo, med njimi i Grižanci. Neki su kontra, ma imamo slikani dokumenti. Trijangli, bubnji, čineli i trubi, pa i saksofoni, uz svoju su poznatu himnu marširali.
Sokolanu su zapustili, ti jedini naš hram kulturi. Još sej' par let tamo zborovalo, tamburice svirat učilo, gimnastiku delalo, a onda njoj se presudilo i do fundamenti zrušilo. Srićun zgradil sej' hotel Internacional i oprl svoje vrata maškarami. Šezdeseteh su mesopust šli organizirat obrtnici i ugostitelji. Stari maškaroni Antić i David dobili su kumpaniju - dičnoga direktora Dragana Baretića, uz bok su mu hodili Pahlić, Pavina, Žvrk, Kordiš, brati Požarići, sa sila maškar zi Matkovići vođeni dičnen kapitanon Jankovićen. Jokeri - Pepon Kordišon, Coca Cola na čelu z Đadun.
Maškarane povorki su nedeljun kretale va parade od nogometnoga igrališća. Na stotine va parade a gledatelji preko hiljade. Pred Interon, pod murvicun, magareće je trki gljedalo. Cela je okolica va Inter prihajala, ma ka Opatija, ma ka Rika, Crkvenica prije Rija. Va Interu pet šanki, se sali bile su pune. Maškarani ljudi cirkulirali su od šanka do šanka, tancali po hodnikeh kad na tancplacu ni mesta više bilo. Muži i ženi bi se iskali i ne bi se celu noć našli. Bilo je i smešneh situacij kada je muž ženun tancal, daj' to ona, ni znal. Tako je i nastala pjesma „Maškare ča moru maškare“ kuj' kantal Toni Kljaković, čest gost Intera i puno drugeh. Svirali su tada omiljeni „Frendsi“ - Marino, Šulc, Kefa, brati Petrović, ma toj' bil bajs i gušt.
Prišloj' novo vrime. Ugostitelji odlučili načinit rošadu. Inter sej' pretvoril va butiki, mjenjačnice, frizeraji. Lipa kavana Atrij, rada posjećena. A maškare na cestu jopet pod murvicu. Onda sej' neki domislel da bi rabilo montirat šator na obale, namesto Sokolani. Maškarani šušur sej' preselil tamo dok se ni pokazalo da je fetiva gospodarica dogajanja BURA. Selilo sej' šator na parkirališće poli Konzuma, pripeljalo poznati pjevači, naplaćevalo biljeti za nemaškarani, ma je i tamo puhalo i šator kidalo. Maškarami sejedno, važno daj krov nad glavun, a bura neka puše i kiša neka moči.
Ma ne do duga, i toga se štufalo aš je puno koštalo. I tako, gredu paradi, va šatoru se vesele, neki novi mlaji ljudi. Jopet gredu maškare. Dohajaju zi okolice, oni si imaju svoji domi i hrami kulture. Pridu nas pozdravit, va paradu poć, gredu vele i dečje reduti.
Maškare se va športsku dvoranu sele ma se isto vesele. Boje se da te opet pod murvicun finit, pa muče. I tako od murvice do murvice, maškare duraju, ma i neka. Veselju rabi načinit mesta ma kade bilo. Do boljeh vrimen, nikomu niš ne fali. Maškarani ljudi veselite se - Polak običaja i navade stare, bubanj i mužika složno udaraj!
