Pala jutarnja rosa na livadi, ke se zelene pune soki, čekajuć ovčice i kozice da pridu past. Mići janjčići i jarčići, zablet te za ki dan va štalah. Gre vrime Uskrsa najlipljega prolićnoga blagdana pa se se mora pripravit da bude čin lipši i veseleji. Tokon korizmi se je utihlo pa je upravo lipo čut kako kantaju kosići čeprkajuć po friško skopanoj zemljice i išću glistice. Tići si išću para, znest te jaja i sedet na njimi čekajuć mladi. Lastavići veselo lete, visoko nebu pod oblaki, gredu lipi tepli dani.
Va kućah oci farbaju kamare, kuhinje. Puno je dela. Dim zi šparheti, začrnil je napu i kantuni od kuhinj. Ofarbat te jih vapnon, belit te se zidi da te oče zabole. Mlaje kćere znimlju koltrini, koltri, prontuju belu robu zi postelj, lancuni, kušinelnice, mirlići. Se rabi lipo oprat, oluštrat stakla i prozori da se diši po čistoće. Ožulile su već drveni podi i skalini bruškinon i zitresle tepihi zi kamar. Ziluftale su veštidi od muškadije, prontale šjarpi, se mora bit urejeno i čisto. Nono čisti postoli, sedi na škamljice i črnun patinun jih maže. Saki ima svoje delo. Nona stavlja robu po sorte, šaru va jedan kablić, belu posteljinu na jedan kup, dečje va mići lavor. Rabi skoristit lipo vrime za se oprat. Neč od robi su već zikuhale va lateneh kableh va lušije, va lušijerah su već prontani sapuni, daski za prat robu, za ožulit očeve hlače za delo.
Oveh dani vrime je od veloga pranja. Potok je blizu, kad fine z prven delon, poć te na perilo. Zadignule svoje široke kotuli i zadenule za pas , nose kabli na glavah ili mašteli na plećeh. Pokazale su svoje bele nožice, keh se retko vide spod dugačkeh berhani. Uz potok su već zibrani ravni kamiki na ki te kljeknut i prignut se do vodi. Vade jedan po jedan komad, režentuju ga va potoku, ožimlju na kopanjice i prakljačun mlate da bi bila mehka. I tako nekuliko puti. Studena njin vodica grize prsti, po letu je liplje, čak se i ofriškaju, ma trpe, već su se navadile. Šegaju se med sobun, prave kakove dogajanja, malo otepaju na tapetu su oneste keh danas ni na perilu.
Mlaje divojki dve po dve va paru ožimlju lancuni i odlažu va lavori pa te razgrnut na špagi i zakučit drvenemi kučicami. Stomanje, dolnje gaće i kombina i lipe štikane spavaćice, va drugi red aš se one ne smeju videt, sramota je. Šaru robu razgrnjuju po lesah i ploteh. Lipo te se osušit i dišat po domaćemu sapunu ki su same skuhale. Mlaje se špricaju vodun, čvrče veselo, mladost je lipa, oče sjaje, naćulile uše aš stareje o sačemi prave. I kakoj' mužen spat i kakoj' teško rodit, ča se kuha, a one tako čagodre i nauče. Pogljeduju se i črljene va obrazeh. Još ako pride kakov šalvadigo malo se šnjimi šegat, razbiže se po grmeh i kikoću. Imet te one ča delat kad se roba osuši, najprvo te ju šumpreštat pa opeglat peglun na žar. A roba će lipo dišat po suncu i arije.
Va Crkvenice je bilo nekuliko štacij kade sej' roba prala i režentala, na izvoreh Črnoga mula, na obale pod čitaonicun, va Dvorskoj i Knežine. Va okolneh seleh Griško-belgrackoga kraja zidari su ženan ozidali perila. Ženi bi brentami nanašale vodu pa bi se roba prnešena va kofah prala, režentala i doma nosila. Neke su još očuvane ko va Barcih i drugeh seleh va Bribiru i Noven, na Polače va Selceh. Žena z brentun, kip Zvonka Cara va Grižanah, posvećena je upravo temi ženami na perileh.
Kad malo promislimo i obrnemo se nazad, onda su naše matere preja imele i vešmašini i sušilice, radio i fejsbuk. Družile su se i se saznale, ni njin rabilo nit gugla, nit četa, nit televiziji. Za se su one imele vrimena i na perilu se družile. Lipe su to bile vrimena, poć na perilo, zakantat, ćakulat.
Danaska uza se pomagala modernoga vrimena, zaprave nimaš dosti vrimena ...