1 - Tribaljski krabunosi 1968. va hotelu "Miramare" va Crikvenici
2 - Mesopustova mat s pratnjun 1965. leta va Triblju
3 - Komandant cele tribaljske parade 1968. va hotelu "Miramare" va Crikvenici
4 - Tribaljski krabunosi i zadnji sopac mišnjic va Vinodolu, Jakov Švast - Koren z mišnjicami na Balustradi va Crikvenici 1968.
5 - "Bela kumpanija" - "Beli" z bandirun bez zvezde 1971. (slikal san jih u Markunih va Triblju)
6 - Tribaljska parada na putu va Crikvenicu 1966.
7 - Sušička "Sloga" i "Momak veseljak" z Pećac iznad sela Sušik 1965. Spreda sidi Mesopustova mat.
8 - Tribaljska mesopusna kumpanija "Lahko ćemo" va selu Gašparovići va Triblju.
Va ovo studeno mesopusno jutro vredi napisat nikuliko besed o toj našoj lipoj narodnoj užanci i o ton ča se je pripećivalo va našen kraju kroz pasanih sedandesetak let, kuliko i od kad ja tendin.
Da se ne pozabi!
Prvo čega se spamećujen je veli strah kad je desetak grdih muških krabunosi obahivajuć po selih po staroj navadi, a bili su okrabuljani još grje nego današnja griška kumpanija „Zbrda zdola", prišlo i va našu kuću. Uhitili su se oko ramen i zatancali muško kolo od koga se je zemlja i va susedstvu tresla, a ja san se od silnoga straha hranil pod stol. Kad me je jedan od njih zel va naramak i rekal da će me zet sobun ja san sprot "umrl" aš su me moji vavik strašili da će, ako ne buden dobar - a ja često nis dobar bil - prit martulos i zet me. Tad još nis imel ni četire leta. Va današnje vrime, va našen kraju i Diogenes svojun svićun bi teško našal dite ko bi krabunosi mogli prestrašit, aš dice ni. Ako naša općinska vlast ne prestane mislit samo na se i na svoje plaće neće bit, za kratko vrime, nijednoga diteta va celon Triblju.
Drugo čega se sjećan je leto dan kašnje 1950. Znan ko je to leto bilo po ton aš san z mamun hodil gljedat brata ki je bil va „Beloj kumpaniji“, a on se je oženil 1951., a oženjeni više na to nimaju pravo. Ta put se je Narod, valjda po prvi put, pobunil protiv onoga „olovnoga" režima ki je zabranjival i mesopusni običaj aš jin je smetalo se ča je imelo veze sa Crikvun, pa su ljudi razbili vrata od Tancarice poli Osipa, ke su Drugovi zaprli kako bi se običaj zatrl, jer se ljudi nete imit kadi okupit, pa su ipak šli nutar. Ne znan kakove su posljedice imeli onijsti kih je UDBA, zbog toga zela na zub, ali jin lahko siguro ni bilo.
Bandira z nacionalnimi bojami
Nakon toga se je užanca obavljala sako leto, tancalo se je i uhucalo, sentenca se je pisala i čitala, opivani su se jadili - niki javno niki tajno - mesopusti su se delali i važigali, ma je saki za sobun pušćal sime za kletu. Drugovi se više nisu pačali pa se Narod ni bunil se do 1969. leta kad su mladići na čelu z Dragon Gašparovićen, nakon puno let obnovili „Belu kumpaniju“ pa se je na čelu parade opet nosila bandira z nacionalnimi bojami - črljeno belo plava bez zvezde. Narodni bunt protiv tadašnje vlasti je, pod utjecajen „Hrvatskoga protuleta“ i motiviran osjećajen ljubavi za domovinu, ponovo zišal na javu. Ponosan san ča san i ja, 1970., zadnjega leta svoga fantovana koracal pod tun bandirun. Nažalost je ta narodni zanos dural još samo jedno leto. Drugovi su 1971. jopet digli glave i s „voljenin" maršalon na čelu z hrvatskimi rodoljubi napunili rešti, uništili cvet študentskoga pokreta i Maticu Hrvatsku ali i sakoga ki se je javno izjašnjaval Hrvaton. Tako je i dobar del „Bele kumpanije" finil v reštu i postal žrtva UDBA-ine torture ku niki nisu mogli podnest.
Čovičina Drago Baretić
Na kraju bin otel spomenut jednoga ČOVIČINU ki je zaslužan za najsjajnije razdoblje mesopusnih običaji od 1966. do 1972. godine na području tadašnje općine Crikvenica i bliže i dalje okolice. To je Drago Baretić, va to vrime direktor novootvorenoga hotela „Internacional" va Crikvenici. On je običaj koga su se odvavik držali Grižanci i Tribaljci, a po komu su, nakon ča su na mesopusni utorak objavili saki svoju sentencu i važgali saki svojega Mesopusta, drugi dan na Čistu sredu va svojih paradah prišli na Griški most i onda skupa prišli va Crikvenicu, iskoristil na takov način ki je, ča bi danaska rekli „promoviral crikveničku turističku destinaciju“.
Ko da ga sad gljedan, kako okrabuljan va bosanskoga pašu va zelenon brhanu sa arapskimi ornamenti, predvodi svoju svitu po naših mestih i poziva nas da pomoremo oživit mesopusni običaji i va Crikvenici, nuteć nan mogućnost da budemo nositelji mesopusnih zabav subotun i nediljun va hotelu „Internacional" s pravon ubiranja ulaznine.
Si smo to prihvatili z obi ruke aš smo tako mogli dobiveni soldi iskoristit za obnavljani opreme i mondur za naše kumpanije, kih je samo va Triblju i va Grižah bilo dvanajst. Rezultat toga je bil da se je crikvenička parada održavala osin na Čistu sredu također i na zadnju nedilju Mesovije na način da su sudjelovala sa mesta općine Crikvenica osin Novoga.
Parada se je sastavila nakon ča bi mi prišli z Griškoga mosta poli igrališća i hodila je Tomislavovun ulicun pa uz hotel Miramare do Internacionala. Bilo je tuliko krabunosi i kumpanij s cele Općine, ali i Rike i ričke okolice i dalje tako da je čelo parade već prišlo do Intera, a kraj parade je još bil va Vinodolskoj ulici. Otvarali su se hoteli Miramare, Esplanade i drugi aš va Interove dvi etaže i tri velike dvorane ni bilo za sih mesta. Isto je bilo kroz celu Mesoviju tako da je Baretić pogodil „u sridu".
Da se nisu pojavili očito utjecajni pojedinci va Crikvenici, kin smo mi smetali i uz obrazloženje da moru i bez nas organizirat zabave va Interu, nas su odbili 1972. Nakon toga smo mi prekinuli iz protesta dolazak na paradu na mesopusnu nedilju ali i tradiciju dolaska va Crikvenicu na Čistu sredu. Nakon toga je „knjiga spala na dva slova".
Da se to ni dogodilo Crikvenica bi sad bila ono ča je danaska Rika, a mordi i bolje, aš smo mi to delali od ljubavi za svoj kraj.
Bilo bi lipo i pošteno da se pokojnon Dragu Baretiću i ton sjajnon vrimenu postavi spomen pljoča va centru Crikvenice.
Tribalj, 6. 2. 2018.
Autor: Žarko Gašparović Markun