Spušćale se maglice nad zaspali vinogradi. Žuti i zmežurani listi načinili su mehki šuškavi tepih na zemlje med trsjen a kade ki list još se klati na mrzlen vetru ča češlja kiti hrasti va okolneh stranah. Samo još par zmržnjeneh grozdi va neken delu vinograda čeka zimsku trgadbu od ke se delaju vrhunske vina. Lipu sliku nad vinogradon delaju beli oblaci kot ovčice ke se rastekle po plaven nebu. Sunčani dan nuti mrvicu teplini mrzloj arije i tira maglu ća.
Bliži se Martinja ka se slavi jedanajstoga va studenomu. Otočilo se mlado vino zi bačav va bocuni i botelji. Arijun lete vinske mušice. Ta vredna kapljica čeka da ju se krsti, da se pretvori zi mošta va vino, da se nuti kumpanjonami, da se nazdravlja, kuša i hvali. Muži jedva dočekali ti dan. Va mesteh kemi je Martin patron, gre se na maši, va svečaneh veštah, popi va crikvah blagoslivlju novo misno vino. Nakon maše gre se na trgi kade se pripravljaju prave fešti od vina, finoga jila i predstavi. Va Zagorju, Slavonije, Međimurju, diljen Lipe naše, dugo vrimena se štuju stare užanci krštenja vina, ke su se pomalo preselile i poli nas.
Va novljansken Pavlomiru, dični biškup presveti Miljenko Žanić, svojun svitun obahaja vinariju, biranemi besedami održi vinsku mašu. Besedi su šaljive, hvali se vino, pijanci i štovatelji vina. Njegova svita na urešenen oltaru krsti mošt ki se tako pretvara va vino. Črno, belo, se sorti, šampanji, rakija i si produkti od grozja toče se va bićerini i nazdravlja. To je govore, postala tradicija se ako se drži samo par let. Da Crkvenica ne zaostane zaten, pobrinuli su se vinari okolneh mest ki isto tako nute dobre vina. K nami pride iznajmljeni biškup, njegova svita - zaprave glumci. Treto leto ako se ne varan pod murvicun se pronta lipo urejeni oltar zi koga gre blagoslov i krštenje. Lipo za videt. Na štandeh se nute vina, si se svojen diče i hvale da je njihovo najbolje. Čuda je vinari i zi cele zemlji.
Veselo je na trgu, sviraju sopci, nekuliko grup. Kantaju zi sega grla, „Trio Crkvenica“ nakrivili kapi, veseli penzioneri tancaju, „Barufa“ i „Mistrali“ veselo rastežu armuniki. Narod se veseli, čagod i poji, nute se gulaš i kotlovina, kuhane kobasice i kiselo zele. Za sačiji gušt. Do dugo va noć traje veselica, a onda siti i pijani muži švergajuć gredu put doma. Va glave se muti, ženi neće štroligat aš Martinja je. Dobra skuža za dobroga muža. Onisti ki su prišli z okolice, prepušćali su volan žene ka tu večer ni pila. Ima, jih ima, ke isto vole popit dobru kapljicu, ma i neka. Kratak je ovi život, kad ti vino pride va krv kola telon i čine ga veselen, brigi se pozabe do druge Martinje ili ke druge priliki.
Zovu nas Grižanci da njin pridemo, sveti Martin je njihov patron. Sedan dani traju fešti, za sakoga se neč najde, pa ki voli neka gre. Ona stara - pij pametno, ne sedi za volan pijan, neka bude sakomu na pamete. Va jednoj dičnoj familje va Grižah, rodil se vnuk, pitaju se domaći kako te mu ime nadet. Stari otac je bil Martin, Martin je i njegon sin, pa neka i novorojeni sin bude mali Martin.
Sretan imendan semi ki nose to lipo ime !