Troše se zadnji dani ovoga leta. Gre vrime, gre, ni stalo ni jedanput pa neće ni ovoga reda. Studeni gre kraju a zaprave nismo ni oćutili studen kakova je znala bit negda va ovo vrime. Sveta Kata sneg za vrata - užamo reć. Na dvajset i petoga na vrata nan bati vrime od prveh Božići, kako se uža reć za Katarininu. Zadišat će i prva slatka orehnjača i prva sarma kako je užanca parićat za svečani obed. Love se katarinčići, miće sardelice od keh delaju rupice. Va kućah se pomalo pripravljamo za vrime Adventa i lipo vrime ko nas čeka za misec dan, vrime od Božića. Uža se reć - Sveta Kata van, do Božića misec dan.
Va mesteh kade je Sveta Katarina patrona pripravljaju se vele slavlja, kite se crikvi a kip svetice izložen je na posebnen mestu. Oltari krase sliki prelipe mlade ženi z krunun na glave, granun palmi va ruke, mač va drugoj, a ruku krasi lipi prsten. Puno ljudi zi Crkvenice i okolice hodočaste put Selac. Polešto na nogi uz more, ne preši se. Ako je lipo vrime, na moru kalma bonaca, još je šetada lipša. Ma i da puše bura ili hladi jugo z mora i vali se prelevaju preko goleh sten i rondulaju pešćace, lipo se ćutiš na na toj arije, hodeć va selašku crikvu na svečanu mašu. Ako si va kumpanije, uz ćakulu vrime brže projde i začas va Selceh. Puno njih pride i va auteh, ma poć hodeć pravo je hodočašće.
Va crikve je puno naroda. Ženi prišle na mašu va selaškeh nošnjah, mlaje va svečanoj - črnen berhanu i kasiću od svilnice, črljenemi fijokami na zadnju stran nabranemi i rubon ošiveni. Va beleh stomanjah nabrnicah i heklanemi hlačami na nogah. Bele njin špici špijaju spod berhani a okolo vrata nabrani kolarini krase tu lipotu. Na prseh zadeveno bokašce, črljenen garafulon i šparugovun grančicun urešeno. Vlasi lipo upleteni. Pridu i malo stareje va beleh radneh veštah, više da ju pokažu kako je lipa i bela, uštirkana a na glavi rubcon zastrte. I građanska se nošnja nosi, lipeh kolori, od veluda zašivene šurkice i kotule. Urešene zlatnemi kadenami i rećinami ki se bati zovu. Lipo urejene gredu i štimano se drže, dečicu peljaju za ručicu a i oni su va nošnjicah. Jušto jih je lipo za videt.
Crikva je prelipo urejena, puna črljeneh i beleh rožic oko oltara i sliki svete Katarine. Velečasni Tomislav biranemi besedami pozdravi seh prisutneh, pozdravlja gradonačelnika ki je sa gospun redovit na mašah za Katarininu. Totu su i gracki oci, gosti, popi i fratri zi susedneh žup. Na radost seh pride i nadbiskup monsinjor Ivan Devčić zi ričke nadbiskupije ki obično i maši mašu. Pjeva selaški zbor, kantaju koristi a mladi posebe lipo sviraju na gitarah i orguljicah. Narod se križa, moli i pjeva pjesmu u čast svoje patrone. Ćuti se lipo ozračje štovanja selaške zaštitnice. Na liceh radost, ponos na rodno njin mesto. Maša traje dulje nego nedeljne maše a nakon blagoslova puka i mesta, pred crikvun nas čeka prava fešta. Toči se kafe, soki, dele baškoti keh je užanca stavit okolo ruki. Nute se fini kolači seh fel ke speku vredne ženi. Ćakulaju ljudi med sobun, pozdravljaju se aš neki pridu samo za Katarininu. Trefe se stari prijateli, deca teku okol kolači i zibiraju ki je bolji. Vesele se lipo urihtane ženi va lipeh pelicah i kapoteh, muži va lipeh veštah. Doma se je se pripravilo za fini obedi. Familje se najdu na ti dan za stolon ili se vesele na place kade se nuti fini gulaš, roštilj, pijača. Tanca se kolo, a sopci sopu starinske kanconi. Dok zvona zi crikvi zovu na obed pomalo se razilaze po kućah a puno se njih vrne na placu nazad. Ti dan se ne dela, nego se slavi.
Sako leto gren va Selce na Katarininu. Va Selca mi je oženjena hćer, va crikve svete Katarine sej' ženila, tamo su mi se krstili troji vnuki a vnuk ministriral deset let. Kašnje se najdemo poli njih na obedu. Ženski deca rojeni va vrime okolo Katarinine krštene se ten imenon. Katarina, Katica, Kata, lipe su imena.
Semi ki nose to ime - sretan imendan a našemi Selcami sretan njihov dan mesta.
Sveta Kata je zaštitnica đaci, študenti, pravniki i abukati, znanstvenici i posebe divojak, pa neka i njimi bude sretan ovi dan!