Zakoračili smo va lipanj, prvi letnji misec pun lipoti, mirisi, tepleh vedreh dani, prveh črešanj, zadnjeh dani školi. Leto je zakoračilo jutarnjun friškun arijun va plićaki na plažah, protegnulo se na vali i mel uz morsku obalu. Prvi su kupači polegli bele tela da njin sunce da lipi ten i zdravlje. Lipi su ovi lipanjski dani, lipo zadiši lipa va cvatu kroz parki od čitaonice do početka parka poli fontani, tri su rascvala drva. Upravo te mame da pogljedaš visoko gore i vidiš ti lipi dišeći žuti cvet a i čelice je čut kako ga obleću i sasaju njegov slaj.
Na početku Vinodolske pred Starun školun, visoko i ponosno stoji jedno velo drivo lipe. Staro je to, jedno od najstarijeh va Crkvenice. Stoji ona kot spomenik semi onemi drvami lipice ki su delali drvored uz cestu se do zadnjeh kuć. Zasajeno je bilo red z desne strani, jedna lipa, jedna murva i činile su hlad stojeć va redu i čekajuć da jih ljudi pridu obrat. Lipu za zdravi čaj, pomoć za pun bolesti. Napili smo se mi dečina čaja od lipice zaslajenoga medon proti kašlja, i drugeh debolec, nabrali bi mlaji ki su se pljezvali i va vrićice brali cvet ki se kašnje sušil i spravljal za zimu.
Va redu i murvi, bele slatke i črne kisele ke su blatile tlo pod sobun a okol ust dečine delali črljeni tragi. Rada smo jih jili. Stavili bi kakov stari tavijol od plastiki, naprtili se i otresali grani pa se sladili. Retko ki se od nas ne spameti toga doba djetinjstva i dragoga nan voća. Saka je kuća imela bar jednu lipu i murvu za hlad va dvoru. Upravo kad projdemo nešen parkon ta lipa aroma lipova cveta spomene nas na to.
Okolica Crkvenice, griško-belgracki i tribaljski kraj se do Bribira i Novoga diši arija po cvetu lipice aš tamo jih ima najviše, onde se još vavik trgaju cveti pa i naši ljudi zi grada gredu poli prijateli pobirat, sušit i va zime uživat va finen i zdraven čaju. Cveti se beru preja otvaranja s pricvatnen liston, suše se va tanken sloju na otvorenomu ma va hladu ne na velen suncu. Znaju to naši stari. Zalihu čaja rabi potrošit kroz dve leta pa obnavljat novun. Tako su njeje prave dobre strani najbolje. Za gripi i prehladi, grlobolje, srčaneh problemi i za smirenje, najbolji čaji.
Ime miseca lipanj je dobil njušto po lipe ka tada cvate. Stari lokvarski kalendar kaže: " Lipa će cvasti, povrće rasti, trava bujati. U stabilnom mjesecu ljudi će uživati."
Živi bili, lipu pobirali va lipnju uživali i po zime se čajen od lipi sladili.