Zazelenilo je proliće svojen pinelon si umejki, se livadi i strani Kotora i Sopaljske. Zelena farba, lik za oče, melem za dušu aš se gre naprvo, znova te cvast rožice, već se naziru dulići od cibori i jabukvic. Žute glavice žutnjaka, maslačka, već se pretvaraju va bele okrugle balice, a kad vetar zapuhne nosi žnjih miće lumbrelice zrakon natječuć se šaremi metuljićami ki će letet više put neba ili se fermat na pereh travice ili rožic. Okolo kuć dečja vriska, vesela i se črči po dvoreh. Miće divojčice va kratkeh zoknicah, haljicah na kratki rukavići, vlasi vezaneh va pletenice ili na vrh glavi va konjski rep, teku semo tamo igraju se - na lovit. Jedna drugu potežu ka će bolje i brže. One su se igrale i na - lipe sliki kad se zavrtiš pa se ukipiš va neku figuru i proglase ki je najlipša. Znale su se igrat i na bici , na šest kamičići. Deškići se polak njih, na drugoj bande dvora, igraju na špekuli. Zikopali su jamice - vagi na zemljanen terenu i gajaju svojeh konkurenti špekulami da jih čin više udalje od škulji fine va njoj i popasu njin ku porculanku. Teren je moral bit ravan, polišan da špekula more glatko proć do škuljice ili protivnika. Sakomu je mat zašila mažicu - miću vrićicu za spravit špekuli. Najprvo bi se zmesile glinenjači od ila, sušili bi jih na suncu. Kasneje jih je kigod pomorac prnesal z Meriki ili bi rodbina poslala va paketeh. Staklanjače, porculanki, bajserice, mjesečarki, japanki, naftalinki. Najveća je bila balun i nju popast je bil kumst. Rabilo je dobro potrefit tuju špekulu. Naciljali bi saginjuć se skoro do zemlji da bi tuju čin bolje odbili. Lipo j' bilo gad su se igrali parnjaki med sobun, osan do deset let ma kad bi prišli stareji farabuti razgonili bi mlajeh, dali njin ćepu za uho i poharali špekuli. Maj' bilo plača. Smirili bi se i onda jopet, mažice bi se nanovo napunile.
Nekada bi i kola natirevali žicun od ambreli i oponašali trki na štadionu. Dečina su se znali igrat na skriva. Jedan bi brojil, do deset i zijal - Ki se ni skril, magarac je bil. Kad bi krenul iskat jih, zijali su - Jedan, dva tri, ja gren. Nastala bi teknja, ala ki prije do spasa, taj igra dalje. To su si deca voleli. A držali bi koga i za bulina, paj' moral brojit i do pedeset.
Stareji mulci su se igrali na - tati i žandari - Dužica proti Gorice. Rajon proti rajona. Se do terapijskoga parka. Znali su se i potuć kacoti bi leteli da bi krvaveh nosi doma kropili. Igralo sej' i na utralo od jasenove grani načinilo palice i pogajalo utralo zi kolobala, ograjenoga kruga da čin dalje odleti paj' bilo teško vrnut ga nazad.
Kuliko sej' krpenjač pokidalo kada su natakali balu po livadah uz igrališće. Kulike bi i va Potoku finile. Neki od jih su postali i dobri nogometaši. Kasneje su se pred školami znalo igrat na graničara, preskakevat preko lastiša, igralo sej' školice, kokalo - okretalo sej' sličicami od nogometaši, hitalo sej' pešćice va zid čija bi dalje odskočila. Rajbalo se je petače i patakuni.
Ma milina jedna ča su negda dečina znali igrat, kako su se na friškoj arije zdravi i rumeni i potni va obrazeh doma vrnjevali. Umili se i opljahnuli tela. Najili bi se palenti z mlikon, landun kruha namazanun materinen pekmezon ili mastun cukaron ili paprikun z malo soli. Drugi dan nakon školi naškrabali bi zadaći i opet van na igru.
Danas je takoveh igrarij retko videt po ona škatulja od kompjuteri i televizije jih je po kućami zaprli, bledi su i boležljivi. Škoda, lipoj bilo videt kad legnu va postelju večer zmoreni i čisti pod lancunami... kako Dule Jeličić pjeva da - kot anjeli spe.
Kad mojemi vnukami o tomu pravin oni reču da zmišljan, zato ovo pišem da se si malo spametimo kako smo se negda igrali.
