Srpanj je dosegal najveće vrućini do sada. Ni va hladu vrelina ne popušća spod 32 Celzija. Na plažah križica ljudi. Ranen jutron već su na pozicijah. Rabi ćapat malo hlada spod pinij, sinjat svoj teritorij, prostret ručniki, najmanje dva a more i više. Neka bude mesta za celu familju. Već par let ista pjesma, bune se ljudi da to ni dobro. Saki ima pravo svoj hlad pod suncen. Kad su mići dečina ten više. Rabi jih zaštitit a stareji te se parit i okretat na suncu ko sardeli na gredelah. Okolo devete počinju karavane. Zi seh stran naviru koloni dece, roditelji, gospe i gospodini pod šeširami, a popratni štrumenti da ne govorin. Kroz uske uličice ne moreš mimo pasat. Domaći već gredu z mora, obanjali su se i ziplavali pa doma na recepciju.
Gredu karavani, zi mićeh uličic zviru koloni, dečina, matere i oci. Saki ima svoj zadatak za nošenje bagalje. Otac nosi luftmadrac, šator, frižideri, dečina opremu za ronjenje, maski dihalice, šlaufi i peraji. Mat najmanje dite va naručju, lipo pokrita šeširon, nosi šaru boršu, ženska se srihtala za na plažu. Za njimi na kraju koloni gegajuć se gre nona. Nona služi za kuhanje va apartmanu, za čuvanje dečini i stvari dok su drugi va moru. Med sobun šprehju na lošen njemačken zajiku, Mutti, Fatti, Oma, Kinderi. Zauzmu svoje mesto pod pinijun, i cel dan se prže na suncu. Toj' bar badava. Va vrime obeda okrepe se burekon i pitun ča je Omi spekla va apartmanu, soki su ohlađeni va frižideru. Do večera ne moraju doma. Ako ča rabe Mlinar dela celu noć. Konzum i drugi nute gotovu hranu, nakon sedme redi su do vrat aš je se jeftineje. Robneh kuć kuliko ćeš, ako nisi se prnesal od doma.
Ne odluči se saki za takov turizam, ono ćutiš se ko doma. Fruštukaju va apartmanu ili hotelu, nakon plaži, okolo pete gredu na terase restorani. Ne moraju dugo iskat. Pred njih skoče presretači - dečki i divojki nute njin knjigi menija, rivaju pod nos. Komen zi, baj uns is bilig ! Od trga prama Črnen mulu saka terasa nuti istešo: lignji na nekuliko mod, ribi se feli, škampi na buzaru, obavezna blitva na dalmatinski i pomfri. Čevapi i lepinje sa žlicun ajvara, malo kapuli i liston zelene salati. Pizza grande - da se četiri moru najist. A pašti - polejene z toćami ki kuhari zmisle i prontaju va dubokeh pijateh. Bez toga ni niti jedan meni. Dojde ti to ko specijalitet kuće , vrh naše gaštronomije. Ponuda je bogata pa ki voli neka izvoli.
Zasladit se na kraju večere sladoledon, ni baš jeftino. Troje dece saki po jednu kuglicu oko trejset kun. Balotica sladoleda, doduše obilata, 8 ,9, 10 kun se feli. Šetnica puna, šeću se do ke dobi. Dečina spe va karocicah, fala Bogu je jih, od lane baby bum. Va portu se vožu barki, one veće su šle put Vrbnika, Šila, imaš i brzi taxi boati kemi moreš doć na školj za 7 minuti. Vise žardinjeri pune rožic na kandelabereh. Daška vetra ni, vrući zrak stoji, misečina gljeda ozgora puna kot nonina pogača. Ma, slika leta na saken koraku. Dogajanja na trgu saku večer. Inter dela tuta forca. Neki zastanu da vide, neki pasuju misleć da moraju platit ako pogljedaju. Trudi se turistička - program prebogat. Za eurići naš će se čovik none preselit i svoj stan izdat ko apartman. Govore daj' Crkvenica puna kot šipak. Neka je !
Na saližeh barikadi, stolice, znaki, cigli, ča bi reć- toj moj parking. Karaju se susedi, na zimu te jopet bit dobri. Ma neka, kratka je sezona, rabi zaslužit ku kunu za preživet zimu. Lipo je naše more, naše sunce, naše primorske večeri. Lipo je čut naši deški Svingeri, Grejsi, Barufe i Trio Crkvenicu. Zi pozornice čut je Marina kako kanta a Kefa i ekipa zdušno ga prate kot negda. Saku večer neš novo. Na plavališću nekakova Figa bar- jel Figa - smokva ili rogi v žepe ni važno, simpatično mesto za sest uz samo more i okrepit se pijačun. Preživet ćemo, neki va hladu, neki na suncu, neki lačan, neki sit. Vrnut te se doma opaljeni od sunca i moru se hvalit da su bili na moru. Sretan nan ostali del sezoni, puno furešti i neka si kuntenti projdu i jopet nan pridu.