Zadnja je mesopusna šetemana, zadnji mesopusni četrtak znani još ko Poberuhi. Gredu maškare, saki svojun muzikun ma z istun nakanun - gredu va poberuhi. Za dneva rano zapolne od vrat do vrat, znanomu i neznanomu zvone na vrata, kramaju, po padelicah kuhačami lupaju, armuniku rastežu i kantaju: „Gospa, na vrateh su van poberuhi, dobar van dan, dajte jaja van, vina natočite, za jist parićajte, nećemo vas štentat ako nan nećete niš dat. Dajte bar ku kunu za zadnju pusnu večeru. Celo leto ćemo vas spominjat i semi hvalit kako ste nas dočekali“. Tako navrezaju, malo se okrepe pa dalje nastavljaju.
Još samo jedna pusna maškarana subota je na redu. Krstit će se mesopust imenon ko mu baš ovo leto paše. Va pasanen vrimenu vavik sej' zval Meriko, a va neko noveje vrime bi mu časna svita nadela ime, ko jušto kaže ki je najveći grih, tostoga. Deški su par dani prije kraja maškar mesili toga čovičinu od slami, navukli na njega staru veštu, a posebni majstor je bil gospodin Hrelja. Delal bi njin glavi od hartuna i dobro pazil da na nekoga sliči. Na ti su se način maškare rugale momentalnen stanju va države, vlasti i kakovoj afere va mestu. Kad su maškare organizirali obrtnici i ugostitelji na tapete su bili Jadranko, Prevrtljivi, Strujomir, Počivalac. Najbolji koga su nan Grižanci ukrali, pa su drugo leto mesopustu - Ukradeni ime dali, Kradljivac, Smućeni, Trezni, Otpisani, Mutni, Svitko i puno još imen.
Ma kako god se zval, krozi šentencu bi bil dobro oštrapacan. Šentencu pišu ljudi ki su vični peru, ki prate dogajanja kroz leto, ki je ča načinil, a da ni smel, ki je šal štrambo, ukral, ili se skurbal. Piše se va rime, kitice od četiri redi, najčešće va osmercu. Ki piše šentencu, retko sej' znalo da nebi bil prozvan. Još jedino va Grižah zna se da ju pišu Sirnik, Mladen Barac i Neven Barac. Ostali se taje ma nabrajaju imenon ili pričvorkon komu gre krivica. Zadnju subotu mu se nadeje ime a na pepelnicu ili Čistu sredu mu pride kraj. Meriko je kriv za se, abukat mu pročita su krivnju, branitelj ga prova obranit, ma na kraju bude ko i sako leto osujen i važgan na vrhu paladi. Za njin nariče dovica, sprovod gre do vrha paladi kade Meriko i skonča va pakleneh mukah, a dovica nariče za njin zi petneh žil.
I tako pomalo maškarami se nazire kraj. Još se gre na Rički karneval, tancaju se zadnji tanci. Negda bi va Crkvenicu prihajali maškaroni, krabunosi, krabulje, mačkare i maškare zi okolneh mest - na pusni utorak. Tribaljci bi prišli na konjeh noseć vriće z popelon i pepelili bi ljudi okol sebe. Sredu više ni bilo maškar, samo su se važgali mesopusti, sredu je bil strogi post i nemrs i zavladalo je mirno vrime korizmi i pokajanja. Za ovo leto se će finit. Maškare te svoje maski znet, svoje pravo lice pokazat, se ako neki masku ne znimlju ni celo leto. Va narodu se uža reć ... Finili su Mare bali - do kletu.
Uz vrime maškar gredu i uzrečice: „Ki o mesopustu polka o Božiću kolka“ ili „Ki se va vrime maškar fraja, Sv.Kata mu pleni spravlja“ ...
