Proletel je prvi misec jednun dušicun. Nismo se ni obrnuli a već smo prišli va febraj. Kuliko j' ovi prvi bil dugačak i rastegnjen, pasal je tako prešno. Zazimelo je, strašili su nas zi televizije, kako će nan bit jaka zima ča se j' i pokazalo. Već letami zapisujen dani od Sv. Lucije do Božića ča čini dvanajst dani i kaže kakovo vrime bi moglo bit tokon leta tokon dvanajst miseci. Va Gorsken kotaru, Lokvami, domaći načine i svoj godišnji pučki lokvarski kalendar, ki ovo leto kaže:
Jenaro ili pak siječanj je bil hladan, vedar i vetrovit misec. Nakon dvajsetoga, moguće su magli, inje, poledice i mraz.
Febraj, veljača, vijača, pometača, već kako ju ki zove, ćudljiv je misec, ko kakova jetikava žena. Na početku će bit miran, a nakon šesnajstoga će se razigrat jugo, prnest sneg. Već je sega i sačesa od toga bilo, pa moremo verovat da će tako i finit. Va febraju se ljubav slavi, Sveti Valentin se prikrada da četrnajstoga zavlada. A mačji fraji počinju, već okol kuć mački piruju.
Va ovi dva miseca poznate su i vele mrzlini, sneg i veli minusi va temperaturah. Jake i orkanske buri. Poznati su i mrzli muži ko ča je Sveti Anton zimski, Sveti Vinko, Vincekovo kad se blagoslivlju trsi, za rodno leto i dobro vino. Drugoga febraja prišla j' Majka Božja kandelora - Svećnica - zima fora se do mora, ča bi reć zima j' pasala, ma j' tretega prišal sveti Blaž, pa j' rekal da ' laž, za njen sveta Kristina pa j' rekla da j' istina. To su se pučke sentence pa ki veruje , neka mu bude. Se više meterologi rabi stari kalendari i izreke aš se puno toga i ostvari. Kako se pokaže zraka sunca, stepli na čas zemljicu, pokažu se beli zvončići visibabic, zabele se spod travice uz potočići okolo Kamenjaka, kamo smo jih užali poć pobirat. Složene bokašca prodaje i jedna placarica i nuti po pet kun. Ma škoda jih je bilo pokidat, a tako jih je lipo videt va vazicah. Uz strani Antova već se naziru žuti maljahni cvetići jagorčevini. Za ki dan te se pokazat sramežljive fijolice, ko lipe plave oči divojčice skrivene spod kakoveh osušeneh gran, ili špijajuć zi suhora. Ma lipota jedna, a kada pasaš uz njih zadiše svojen parfumon i zbude te zi zimskoga sna. Ma, se mi se para, da te ovo leto malo zakasnit, da te se još pred snegon skrit do marča počekat. Kako će se to prešno pasat, maškare te finit. Prit će Pepelnica, za pokoru ćemo se popelon posut a va Korizme ćemo postit i ko janjčići utihnut do Cvetnice i Vazma. Leti vrime ko pere, dan za danon se duže je danje svetlo.
Steplit će nas marčeno sunce, zitirat van va polja i njivi. Priroda će se zbudit zi zimskoga sna, a tičice će svojen kanton drugačije vrsadi parićat. Teče vrime, listi kalendara obrću se ko kolo, lete leta a mladost začas mine. Ko i va prirode tako i va čoviku ko na rozariju prebirajuć očenaše, vrime gre, neumitno gre, jagmimo se za dobren, za bogatijun, pozabimo da zaprave rabimo malo, jušto tuliko ča va šaku stane zato se veselimo sitnicami, aš život je kratak ko i najkraći misec febraj.
