Se ča je lipo okol nas je veselo, teplo, črljeno opiturano.
Garaful va važu na poneštrice, šipak črljeni opleten okol drvenoga barsa se do črljenoga krova na kućice. Črljeno je ofarbana saki drugi lonac ili padelica va ku smo posadili šare rožice. Ne reče se badave da je zdrav dečji obraz najlipše črljeno opituran. Črljena je prva ljubav va srcu divojčice i kap vina na usnice.
Va prirode črljene se jagodice i črešnjice, na staroj jabuke okrugle pune soka vožu se na vetri jabukvice. Črljena farba privuče ti oče na kakove lipe majice i haljice ke nase obuku lipe divojčice, a va vlasi upletu fijoki od svilice.
Jutros na place črljena van je farba siguro privukla oče na kašetice pune črešanj, dišećeh jagod. Kad jih pogljedaš onako oble, velike i debele slini ti valje zi zubi cede i koda ćutiš slajki ti se niz grlo cedi a uspomeni naviru.
Saki je vrt negda imel nekuliko stabal črešanj, neke su bile rane ke zreju polovicun maja, neke roskaste, zvali smo jih bele, a sad pred jun zreju one debele i sočne jako črljene. Okol nas su bile najpoznateje griške sorti, Griškinje su jih pobirale i va košarah na plećeh nosile put place. Ki jih ni imel okol kuće rada bi kupil baš teste. One su imele najviše slaja i bogat okus. Poznate su i lovranske škure, bi reć črne.
Danas na place pitan skuda su, na sakoj piše zadarske, dalmatinske, samo jedna domaća ženska skromnen košićen nuti griške. Teste san odlučila kupit. Kašetica do kašetice, do njih se črljene jadodice. Diše i mame. Kada jih kupiš, opereš malo pocukaraš, moreš i šlaga našpricat i guštat. Črešnju zoblješ jednu po jednu. Pašćicu pljuvaš van, okol sebe delaš nered. Odvavik je tako bilo. Poprtit se na stablo po čljenjeh, najslađe je bilo poć u suseda, deški su va tomu bili spretni. Natrgali bi i punili va košulje, maje bi njin bile se flekave. Obično su stareji čuvali skriveni va vrteh i onda nagarili mulci šćapami. Bilo j' i padanja i smeha i plača, ma jutra opet naharač. Jutra je bil na redu rasadnik va Vinodoslkoj. Prišuljali bi se do Macela na desnoj bande potoka i preko kamiki preskakali vodu dok potok ni bil visok. Ne jedanput bi va Triblju oprli branu, navrla voda i morali su bižat do trbuha kroz ledenu vodu, i to kropit aš bi kolcen dobili od čuvara. Doma bi prišli mokri, košulje razderane i črljene od žmižljeneh črešan. Malo ka generacija to ni prošla. Ali ukradena črešnja je bila najslaja.
Cijeni su jutros prilično visoke. Trejset, četrdeset kun za kilo. Preja bi se lahko i fini kolači načinilo. Štrudeli, jogurt kolač od črešanj, od patišpanje. Ovisti bi bil jako skup, pa si kupiš samo pol kila da se malo uželjiš. Prve obično nisu bile črljive, znali bimo reć ni nutre mesa, ma neke su imele črvi. Kako smo jih negda bili željni nismo nato abadali. Se su jednako bile dobre. Ma neka sazreju još malo. Morda će pojeftinet, onda ću jih kupit i slatko pozobat. Sjetit se one najveće zi vrta mojega ditinjstva.
Još i sada stavin nučicami okolo uha duple črešnjice ko rinčice kako smo to mi negda ko divojčice delale.