Visoko nad Crkvenicun Kotor kot soldat va gvardije stotinami let stoji, stolića broji, puno pameti.
Pameti saku kućicu miću od desetak ke su gore bile, va njegoveh njedreh stisnute jednu uz drugu. Saku lešicu, gromačun ograjene kompiron šenicun i jašmikon zasajene, čije su se klasi klatili na vetru. Pameti saki trs i maslinu, saki kus okopane siromašne zemlji, saki žulj na grubeh rukah vredneh ljudi i žen ki su se za kruh i hranu sagdanju morali saginjat pod tešken bremenon dela i življenja. Spravljajuć saku kaplju kiše va štirni da bi imeli za žeju utažit i ovčice napojit, za dečinu odhranit i na nogi dugnut. Muži su ostavljali familje i delali kot manovali, zidari ili ribari, i po Merikah hodili. Ženi jih virno čekale i o kuće se skrbele. Teške su to i skromne vrimena bile a želja va srcu, moru bit bliže i put mora se preselit bila je vela. Pogljed spušća prama konalu kade ga ozdola vali pozdravljaju a galebi i bele jadra barak mu mašu.
Gljeda on na jednoj bande Kotorska draga ga Dolcen i Ladvičen, spaja, a na drugoj preskače Potok, pa se prti prama Ljubavnoj cestice, Sopaljskoj i Kalaškoj. A kad mu se oče prama moru zagljedaju, ne more se naužit lipoti. Kala i njeji uski puti kot srce, svojemi žilami kucavicami cirkulon pod murvicun se spaja. Črljeni krovi stisli se jedan do drugoga kot najlipši črljeni koralj okol divojčinoga vrata. Na belen kamiku veloga trga pod murvicun kot na beloj stomanje su barki i jadra načinili kolarin od heklaneh špic, okol vrata lipe divojčice. Parki puni šareh rožic, ko boko na prseh, krase obalu čineć ju još lipšun i dišećun. Obala se proteže svojemi mićemi i velemi valami se do Svetoga Jakova i Svete Jeleni. Na drugu bandu preko mosta, preko lipe nan Dubračini, grle se Dvorska i Knežina. Znad nje Benići i Šupera pa preko Hrusti spajaju se pitomemi Selcami se do Slane. Pozdravljaju se zvona Vele crikvi i selaške crikvi Sv. Katarine kad se na mašu zovuć lipo kampanaju.
A more valami dotiče koreni stoletnjeh agav, ancipresi, črniki, primorskeh bori i pinij. Maslini su totu, leandri, lucmarin, lavanda i šipki va saken vrtu. Palmi svojemi kitami na vetru kot ventule, zrak nose prama najlipšoj šetnice lungo mare pa jih hladi. Pešćace se rondula, na pesku mel na njen ostaju dečji tragi postolići ili boseh nožic, kad tuda teku. More njin slane kaplji šalje kad bura praši. Ljeska se more na suncu pa litrat čini još lipšen. Kad jugo valja teški vali čini drugačiju sliku i kad su vali i oblaci škuri i puni dažja naš je kraj lip i posebnemi kolorami opituran. A tek kada sunce gre va smiraj pa se zlatni i žuti kolori razleju po konalu i grle školj, kot da zlato teče. Mladi zagrljeni par, namurano se gljeda, kušuje i gušta dok njin galebi kantaju.
Ma ke lipoti. Koga mirakula nuti naš lipi grad. Litrataju ga domaći i strani gosti, šalju put celoga svita tu najlipšu hartulinu zi Crkvenice. Prit te i njihovi kumpanji da se naužiju sunca, mora, dišećega zelenila dva metra od obali. Naužiju se dobre hrani i vina, vrnu se doma i pamete, pamete saki kantun va ken se skriva lipota.
Kade toga na svitu ima, ni Tahiti ni Kanari ni sa svetska mora nimaju ovako lipu azurno plavu boju ka se nebon spaja znad našega kraja.