Danas je Sveta Kata, milo će kampanat zvona crikve Svete Katarine va Selceh i zvat narod na velu mašu. Kad pride Sveta Kata uža se reć da će prit sneg za vrata. Da će zazimet i prit morebit prvi sneg. Kako sej' se promenilo ni više ni te reguli, vrimena se menjaju.
Užalo sej' reć da su prišli prvi Božići. Va kućah te zadišat prve orehnjače i prnest one lipe aromi kako i gre uz ovi lipi blagdani na pragu Božićnoga vrimena. Četire šetemani pred Božić počinje vrime adventa, vrime iščekivanja rojenja maloga Isusa, vrime došašća. Do toga vrimena kuće bi rabile bit oluštrane i čiste, ukrase se, nekako se osjeća to lipo ozračje. Va familjah se sastanu si člani od najmanjega do najstarejega, nabavi se zelenila, borovini ili jelovini ča je znak besmrtnosti, javorika ko znak pobjedi, cedrovina snagi i pomoći onemi ki pate od bolesti. Splete se venčić od zelenila, ukrasi črljenemi bobicami ili ken drugen ukrason, fijočićami, bućicami već ča ki ima. Negda siromašan, jednostavan a danas bogat i urešen. Na venčić se stave četire sveće. Svaku se nedelju pali po jedna svećica i saka ima svoje značenje. One su znak a najvažnije je da nan prnese va srca svetlo nadii dobroti.
Prva sveća je - sveća NADE I IŠČEKIVANJA
Druga - MIRA I POMIRENJA
Treta - RADOSTI I IŠČEKIVANJA
Četrta - SVEĆA LJUBAVI
Po prvoj nedelje od pondeljka, užanca je hodit na zornice - rane maše, hodilo sej' po sakakoven vrimenu i za bure i za kiše i za snega, cele familje hodile su put crikav, da ni bilo mesta za seh ljudi. I nas su dečinu budili za poć na mašu, a kako smo samo lipo kantali. Lipe su to bile vrimena, sad je manje ljudi ali užanca dura. Redaju se dani do Božića, skoro saki datum neč nosi.
4.12. štuje se Sveta Barbara - zaštitnica od udara groma i zaštitnica kućnoga praga. Divojčican va to vrime bili bi nadenuli imena Barbara, Bara ili Barica.
6.12. pride nan Sveti Mikula, zaštitnik mornari, siromaji i miće dece. Va župah ke nose njegovo ime gre se na maše i fešte, pomorci hodočaste va crikvu va Kraljevice, a va Rike put Trsata, trsatskemi skalami i mole se za mirno more i sretan povratak zi vijaji. Svetoga Mikulu posebe vole dečina aš njin prnese regali na poneštre, ajme veselju ni mere kad va zluštrane škornjice dobiju ki regal. Ki ni dobar i šibu je zamerital.
13.12. pride Sveta Lucija, zaštitnica oč i vida. Seje se šenica, bar za sakoga va kuće po jedna. Dečina se najviše vesele dolasku Božića. Počelo bi se peć i suhe slašćice ke moru dugo stat, nona bi jih dobro skrila da dečina ne pridu do njih. To su bile galetice na mašinu, drobni kolačići seh fel. A kuće diše po slaju od cukara, orehi i mendul. Divojčice rojene va to vrime krste se lipen imenon - Luce, Lucije, Lučijane i kade ki Lucijan ili Lučo.
Tako pasuje vrime, dan po dan se smo Božiću bliže. Na kalendaru dani se manje, gremo k noven letu, molimo se da nan dojde čin lipši, morebit i beli pa nas snežak zasuje. Da radost dece bude veća, da nan srca budu tepleja, jedan drugomu budemo bolji i srićneji. Gre nan jedno lipo vrime, a kad zapalimo i zadnju sveću - ljubavi na Adventsken vencu, neka nan ta ljubav da snagu za dalje. Va ove hude vrimena treba nan radosti čin više, homo va naš lipi Adventski park, bit će sega lipoga za seh od najmlajeh do najstarejeh.
Družimo se, kantajmo, tancajmo a o Božiću pravit ćemo drugi put.