Zadnja je mesopusna šetemana finila. Zadnji mesopusni četrtak su poberuhi pobrali se ča se j' moglo pobrat. Va Selceh su pasanu šetemanu mladići hodili za veloga mraka pobirat kramariju okolo kuć, gaće zi sušila, rećipeti, se ča bi se na sušilu našlo pa bi se drugi dan rugali z onestemi ki su prišli po svoje. I va selašken domu se j' četrtkon tancalo na zabave a nedeljun igralo tombulu. Zadnja subota je finila veselun maškaranun zabavun va športskoj dvorane, zabavljale su jih kantajuć i svirajuć „Učiteljice“. Si su bili kuntenti aš takoveh još u nas ni bilo. Podeljene su vredne nagradi za originalne maski za ke su se neku silu trudili.
Časna svita je zibrala ime Mesopustu znakovitoga imena "PREKOMOSTIĆ" ča j' aktualnoj situacije va gradu jako pasalo. Do griško - belgrackoga kraja je bilo devet stareh mosti preko Potoka, dodani su još tri novi. Poli igrališća, niže ambulanti, lipi črljeni poli "Plodin" i još iza Pavlinskoga staroga mosta - Most uzdaha - aš preko svati pasuju nakon ženidbi va crikve.
Va pasanen vrimenu mesopustu se j' vavik zval Meriko a va noveje vrime šezdeseteh let bi mu časna svita nadela ime, ko jušto kaže kakovi su mu kroz leto bili najveći grihi. Deški su celu šetemanu prije kraja maškar mesili toga čovičinu od slami, navukli na njega staru veštu, a posebni majstor za to je bil barba Hrelja. Vičan načinit velu glavinu od hartuna i dobro pazil da sliči na toga grišnika. Na ti su se način maškare rugale aktualnen stanju va države, vlasti i kakovoj afere va mestu.
Za vrime kada su maškare organizirali obrtnici i ugostitelji na tapete su bili Jadranko, Prevrtljivi, Strujomir, Počivalac. Najbolji, koga su nan Grižanci ukrali , pa su mu drugo leto dali ime - Ukradeni, Kradljivac, Smućeni, Trezni, Otpisani, Mutni, Svitko i puno još imen. Ma kako god se zval, krozi šentencu bi bil dobro oštrapacan, osujen i važgan na vrhu paladi.
Šentencu pišu ljudi ki su vični peru, ki prate dogajanja kroz leto, ki je ča načinil, a da ni smel, ki je šal štrambo, ukral, ili se skurbal. Piše se va rime, kitice od četiri redi, najčešće va osmercu. Ni se obznanilo ki piše šentencu da nebi bil prozvan. Još jedino va Grižah zna se da ju pišu Sirnik, Mladen Barac i Neven Barac, i šćeto se napiše imenon ili pričvorkon na koga gre krivica. Zadnju subotu mu se nadeje ime a na pepelnicu ili Čistu sredu mu pride kraj. Meriko je kriv za se, abukat mu pročita su krivnju, branitelj ga prova obranit, ma na kraju sako leto ga čeka ista sudbina. Za njin nariče dovica, sprovod gre do vrha paladi kade Meriko i skonča va pakleneh mukah, a dovica je nariče za njin zi petneh žil.
Maškaranomu vrimenu je prišal kraj. Obavil se j' Rički karneval kade su crkveničke, jakovarske, dramaljske i selaške bile med najlipšemi. Va Selcu će se utorak mlatit i zapalit slama prama staroj užance staroj preko 150 let. Prama tomu kao gre dim užalo se j' reć - ako gre zmora zgoru bit će rib i turizma, a ozgora zdolu - šenice i kompira. U nekoga utorak, u nekoga sredu važgat te se mesopusti. Sredu je Pepelnica, zapovedani post i nemrs i zaten zavlada mirno vrime korizmi i pokajanja. Ovo leto maškare su bile kratke, sega pet šeteman. Znet te svoje maski svoje pravo lice pokazat, se ako neki masku ne znimlju niti celo leto.
Va narodu se uža reć: „Finili su Mare bali - do kletu“.
Uz vrime maškar gredu i uzrečice : „Ki o mesopustu polka o Božiću kolka“ ili „Ki se va vrime maškar fraja, sveta Kata mu pleni spravlja“.
