Va zadnjoj šetemane va agustu već pedeset i prvi put, za srićno finjenu turističku sezonu, poli nas zaredaju dani ribarskoga tjedna - ribaske fešti.
Va to vrime užaju bit još lipi i tepli dani, furešti malo pomalo gredu put svojeh destinacij, dečine počinje novo školsko leto. Leto gre kraju. Neki od turisti pridu baš va ovo vrime da bi guštali va ribljeh delicijah, poznate gastro ponudi na se modi i od sakakoveh rib. Od Vele paladi, duž obali uz trg i prama maloj paladice, parićuju se banki i klupi za dočekat gosti. Pomalo nan gre veli i veseli šušur zadnjeh dani ove sezoni.
Uz kip staroga ribara, lipa slika - stara barka na suhen, ribar pod ćepicun plete mrežu ili redi svoji ribarski arti i parićuje parangal, jaška povrazi, ćika svoj španjulet. Šoto banka naslagane kašeti, ko da se jušto večeras spravlja lovit ribi, zasakat sakon malo morskoga blaga. Ponest će doma za prehranit familju. Lipi litrat, kot da je načinjena živa ajnziskarta. I bocunić vina je totu, stari lateni lončić i boca vodi za načinit žmulj bevandi.
Kantaju va prolazu „Trio Crkvenica“, Žika, Pišta i Skomerža se domaću za domaćun navrezaju. „Crikvenice misto moje“, „Ako se želiš zabavit poć“, „Kad vidiš majko jadra na punte Vrbnika“. Opravljeni baš kako rabi va mornarskeh majicah, črljenen facolon okolo vrata, starinskemi hlačami i klobukami od slami. Brez njih ni prave fešti z mora. Bi čovik reć, ne bi ribarski bil brez njih isti. Dalje naštivane klupi i banki, kantaju i domaći i furešti, vožu se va taktu. Si se grle i vesele, najili se, napili pa guštaju. Va kuhinjah se nute ribi na žaru, arija vonja po dimu zi gradel po lignjeh, lokardah, ćevapćićeh, po zagorenen ulu. Porcije za porcijun konobari nose za stoli.
I tako štand do štanda, va centru vela padela z dagnjami, mešaju jih penzići, diše bruditi i toći. Pivičina se toči na litri, oblizuju se prsti. Neki jidu kruhon, neki palentun. Vidi se na ljuden da uživaju. Ni čevapi ne izostaju. Jedni privatnici nute slavonski specijaliteti - kotlovinu, a neki čak kiselo zele, kobasice i prašće nožice. Neka zame ki ča voli. Na gradelah ima i ražnjići od plavic, rupic i fineh sardeli. Muzika na saken koraku, veselo se tanca i kanta. Se redon do male paladice, tamo su redovito naši crkveniški ribari. Oni nute brudit od škarpunad, ča bi reć od mešaneh rib, i ki god škamp špija zi lonci da toć zasladi. Va kotlićeh se kuhaju bruditi a parićuju jih ekipi ke se natječu čiji će kotlić bit bolji. Za nikoga neće prefalet, toga je i je na saken kantunu. Na binu pridu gosti kanturi, poznate klapi, tamburaški sastavi, kantaju zi sega guta, saki čas moraju čagod popit da njin se grla ne osuše. Tancaju ljudi polki i valceri. Bašta njin se. Stoli okolneh restorani su puni, živosti, šušura sakuda.
Ne moren da ne dodan utisak daj' malo Crkveničani, oni stari ki su se med prvemi počeli bavit turizmon već su zdavni na cimiteru, za ribarku feštu tancali bi uz kanat i svirku svirači zi hotela „Esplanadi“. Saki je hotel imel svoj del paladi klupami i muzikun i ponudun zi svojeh kuhinj. To je bilo poznato, sam si zibiral ki ti je kuhar draži i ki konobari tamo delaju. Sada va zakup zamu štandi privatnici. Trude se ljudi ali fale gospa Danica, Kruno Car, Braco Spojaman, Ico i Stipe Musa, na čije se plati od rib čekalo va redu. Štrudeli od jabuk teti Mice kuharice, razgrabili bi se najprvi. Ni više nekeh drageh ljudi ki su bili sastavni del Ribarske fešti. Sad su neki drugi, ima puno mlajarije ka se toga ni ne spamećuje.
Trude se vredni ljudi va Turističkoj zajednice, program je bogat za sačiji gušt. Saka njin čast. Ki god euro sej' zaradil pa se more malo i počastit za ultim. Lipa je Crkvenica i neka fureštami ostane va lipoj uspomene, a litrati neka kažu drugemi ki te nan prit a stari te se jopet vrnut. Neka nan bude lipo vrime i od suboti štartamo uz naše mlade muzičke snagi – „Barufu“, simpatičnen Žakon a finimo z klapun „Rišpet“ i vatrometon.
Do drugoga leta - živi i veseli bili !