Kad familja ni imela dosti mesta za pirovat va kuće, večeru bi se pripravilo va nekoj većoj gostione, a ako j' mesta bilo, svaća veselo kantajuć je put mladine kuće hodila. Za svaću se na veliko hodilo kupovat vino na Boduliju i barkami doma peljalo. Celo j' susedstvo prednjih dupljaki nosilo i pjevalo – „Svatovi se okitili vinon a mladenci dogodine sinon.“
Va najvećoj prostorije va kuće bi se čak i neki deli namještaja pomicali da bi si svati stali. Stoli su bili jedan do drugoga naslagani, lipo štikanemi tavijolami pokriti, kantridi jedna do druge na gusto postavljene. Va ostalen delu sobi bilo je mesta za tancuri. Servirani su plitki i duboki pijati, zdeli za juhu, za salati, escajgi i čaši, posuđevali su se za tu priliku od susedi a ako j' bila prilika šli bi posuđevat va restorani ili hoteli. Rubi stola bili su lucmarinon okićeni. Ki je imel lipi sudi još mu je bil stol lipši.
Okolo hrani brinule su se vične kuharice i dve tri pomoćnice - svatovice. Kako je to najčešće bilo zimsko doba, imelo se j' doma praščevini, domaće kokoševini pa su zi kuhinje lipo dišale pečenki, kuhane kobasice i sakakove kisele salati od zimnice. Za tu priliku bi se kupovala govedina da bi juha bila jaka i fina, va njoj domaćemi rezancami zakuhana.
Slašćice, sitni suhi kolačići užali su se peć i dva tjedna preja ženidbi, a filani i kremasti va tjednu prije. I za taj posal bilo je poznateh žen ke su dolazile doma poli mlade i mesilo bi se i peklo va veselen raspoloženju.
Najprvo se na stol nosila juha. Zatim ovali kuhanoga mesa zi juhe, verdura i zdelice posebno spravljenoga ribanoga hrena. Za glavno jilo nutili su se šnicli va toću ili gulaši z njokami, a pečenki i kompira ni smelo prifalit. Redalo se jilo, žvelte su pomoćnice samo menjale prazni ovali. Poslje polnoće nutila se j' sarma i kiselo zele. Bilo je vrimena kada se ni imelo tuliko dobre hrani pa bi se i skromnijen pasali.
Nakon obilatoga jila, zaredale bi red tanci, red kanti. Sviralo se valceri i polki, igralo se kola, šegali su se med sobun, čak igrali i sakakove igre da bi bilo smeha i zafrkancije. Na polnoću bi se mladoj znel vel i si bi zakantali – „Popuhul je tihi vetar i odnesal Mari krunu“. Mlada je užala poć suć vjenčanicu i obuć za spravnu, kratku ali isto elegantnu. Mladi, sada muž i žena tancali su prvi, a za njimi roditelji kumi, i jedni drugi med sobun.
Kad bi pirovanja bilo dosti del gosti je šal doma, a del je mladu otpratil do kuće mladoga. Na vrateh jih je čekala svekrva slatken vinon, a mlada bi pitala: "Ča j' to majko?" a ona bi odgovorila: "Va čaši je LJUBAV, MED I DOBRA VOLJA". Mladence bi povukla va kuću zagrnuvši jih šarenin rupcen i tako je dala na znanja da je sada mlada njihova nevesta a pirni bi njin još podoknicu zakantali.
Isti dan večer vrnuli bi se mladoj va kuću da bi mladu dočekali ki na piru nisu bili, prišli bi na popirnicu. Tad jih je mlada nutila suhemi smokvami i rakijun i si bi ju dobro zagljedali kakove je sorti. Tu je večer bilo pripravno ča j' još morala zet va muževu kuću.