Zatulil je Antonjski rog, zazvonile zvona, a zvončari, boreć se z burun, obahajaju po mesteh ričkoga prstena, kade maškare krenu svojen dugen puton, klateć se na glave z grdemi, strašljivem maskami, mačukami. Jušto onako grdi kuliko rabe bit da bi potirali zli duhi zimi okolo kuć, okolo štal z blagon i ljudi. Verovalo se da jušto oni svojemi grdemi maskami i larmanjen potiraju zimu i dozivaju proliće pa 'j ta užanca i do sada ostala. Va našoj regije krenut te po okolneh selah Triblja i griško -belgrackoga kraja kumpanija " Z brda zdola" jedini još fetivi krabunosi. Va okolneh mesteh sako selo ima svoje maškare, šije se i veseli za poć na Rički karneval i pokazat se va najboljen svetlu.
Va Matkovićeh se 13. ovoga miseca diže mesopusna zastava. Tamo se kumpanjaju grupi zi Crkvenice - Gornji kraj i Duga, zi okolneh mest - Jakovari, Balarini, mladost zi Svete Jeleni, selaška mantinjada, pridu i Bribirci, Belgrad i Drivenik, lipo budu dočekani pijačun i fažolon, finemi fritami i slašćicami ča parićaju Matkovićarki. Dojde i sa sila susedi ki vole maškare i malo se si skupa zabave. Večer se gre va športsku dvoranu na zabavu. Večeras te se točit gemišti na galoni aš nan je gost Mladen Grdović, pa neka bude veselo. Gradonačelnik će predat ključi od grada meštru i maškare te zavladat gradon na četiri šetemani aš mesopust ovo leto tuliko dura.
Va novljansken kraju, Bribiru, Selceh ki drže do stare užance i štuju tri zadnje šetemani - Tusti , Husi i Poberuhi, krenut te paradi pozdravljajuć grad i selo od kuće do kuće. Šegat te se divojkami, krast zi sušila robu, zi vrti kakovu kramariju i povišat po drveh va centru, da bi bilo smeha kad bi divojki svoje gaće i prsluki pobirat prišle. Na pusni utorak te deški divojki po kućah pozdravljat, a na pusni utorak ženi va nošnjah slamu mlatit i kolo tancat. Va Noven te se kola tancat, lipe nošnji pokazat i kantat. Mesit te svoga mesopusta, pisat te se Žitak ili šentece. Rabi se parićat kako bi se i ovi mesopust obavil i krivcu za si grihi presudilo na zadnji pusni utorak ili čistu sredu obesilo ili važgalo. Gredu paradi noseć svoji barjaki, ženi, divojki, mladići i muži, va nošnjah svoga kraja, štimaneh kapitani va uniformah bubnji i muzika saki na svoju modu i saki sope i kanta.
Užanca pozdravljanja kuć je i u nas. Maškare i maškarene grupi kreću već od prve šetemani za Trimi kralji. Gornji kraj pozdravlja parada maškar Gornjega kraja do mosta. Matkovićari pozdravljaju svoj rajon od Tončićeva do cirkula i Petaka, a Duga zapadni del, po svojemi ulicami gredu četrtkon i nedeljun. Dični kapitani pozdrave domaćeh, gazdaricu, familju ki jih dočekaju vinon, fritami ili sendvićami i daju ki solad kako je i užanca. Oni njin zahvale biranemi besedami: "Ovdje ćemo pozdraviti dičnu familju… Bubanj i mužika, složno udaraj!" A na odlasku: „Hvala na milome daru - Bubanj i mužika, složno udaraj!“ Grupi gredu pozdravit gradonačelnika i općinari, kade budu lipo počašćeni.
Maškarani tanci kreću po hoteleh, domeh, po šatoreh, po dvoranah, već ki ča ima. Menjaju se muzičke grupi, kanturi, poznati i manje poznati. Veseli se, tanca, juhuhuče i klati. Lipo j' to vrime kada čovik malo pozabi na sagdanje brigi, malo se opusti i zabavi. Vavik se najdu majstori maškaranja pa se vide lipe, šare maski, natječu se ki će bit lipši ili grđi. Va ovo vrime ni više oneh grdeh ko negda. Sada su maškare šareje, va šesnoj robe, lica napiturane, malo ki stavi masku. Vrimena se menjaju pa i to. Gredu reduti dečje i vele. Lipo je, i neka je! Maškare ne poznaju depresije samo veselje.
Menjaju se i mesta sastajanja maškar, se ovisi o vrimenu ko nosi svoje. Maškaranja va oveh krajeh bilo je od vavik. Od Gornjega kraja, do murvice, po birtijah, Sokolane, hoteleh, šatoreh i športskeh dvoranah. Jedno su se vrime maškare morale skrivat po kućah aš je to bilo "nepodobno" i zabranjeno, ma maškaranu dušu niki ni mogal zlomit. Tako se od staroga, antiknoga, do modernoga vrimena. Pokrit lice, stavit masku, opiturat se, lipo ili grdo obuć, va njedreh vavik kuca srce ko maškare voli i ki će dok god je snagi va telu za maškare živet.
Pasevat će vrime, ma maškarani šušur kakov bil da bil, sako će se leto za vrime mesopusta jopet ponavljat z leta va leto, aš to je naša užanca i navada stara. Prenest će se na dečinu, na miće maškarice a oni te užancu prenašat dalje. Tako i rabi.
Zato, ki more, neka va maškare gre. Va oven siven i grezen vrimenu, va ovo vrime do prolića neka se veseli. Vrime i tako brzo projde, pa se z nostalđijum spamećuješ teh dani.