Prišli su i dani kruha. Listopad je već zagazil va drugu polovicu, ulazin va noninu kuhinju kroz vrata sjećanja. Na stolu najden nonin kruh tek pečen, korica mu zlatno žuta, hrskava, dišeća. Kruh z ljubavun i trudon stvoren va slatki zalogaj pretvoren, kot dukat žut. Dok na stol pride dug je put, zemljicu ziorat, šenicu poset, klasje kosit pa va malinu va muku smlet. Z ljubavun je muka posoljena, mlakun vodun i kvason polevena. Teplemi noninemi rukami zamešena, va mehko testo pa pečeno i svojemi najmilejemi podeljeno.
Krozi celi listopad duraju dani kruha. Dani kada se zahvaljujemo za si regali ča nan zemlja daje. Moli se i zahvaljuje za plodi na poljeh najdeni od dela vredneh ruk posajeni. Dišale su oveh dani peknjice nekako posebe lipo. One va Vinodolskoj već zdavni ni, rada smo va nju hodili po kakovu slašćicu, po kus kruha, finoga, mehkoga, beloga. O Vazmu bi zi nje dišale pogače ke su matere nosile speć. Delili smo mi dečina med sobun kusić kruha kot da je najslaja pogača. Hodeć va školu, nasitili smo se da ni rabilo marendi. Kruh ni jako skup, rabilo je bit za sakoga. Ma neki su ga bili i željni. Vavik nas je mat učila da podelimo z neken ki ga nima a nedaj Bog da bi ga hitili. Poli nas je puno peknjic, naštivani su pulti kruhon, sakakoveh fel, kolači i slašćic dok va arije caruje tepli slatki miris i mami da jih kupimo.
Lipa je užanca da učiteljice va nižeh razredeh uče dečinu o važnosti kruha, po razredeh se mese krušići, miće ručice mese testo va sakakovi obliki. Obrazi su njin beli od muki, tarvezići njin štite robu, guštaju i smeju se srdačno. Kad zadiši školski hol izloženen kruhon, velečasni ga pride blagoslovit, a onda ga se slatko poji. Lahko je sada va šparheteh na letriku speć kruh, a davno vrime još pred 15 000 let testo se peklo pod zemljun pod popelon, kašnje pod črepljun na otvorenen ložištu na kominu, a pred 400 let počelo se gradit i krušne peći.
Kada se reče da je život pomorci težak uža se reć da je to „kruh sa sedan kor“, „poć trbuhon za kruhon“ - poć va tujinu delat. Va crikve na pričeste primimo hostiju tijelo Kristovo ko znamen kruha ki je Isus delil na zadnjoj večere. Zato - hvalimo kruh, delimo ga s drugen. Do njega se tešken delon pride ...
„Ne išći kruha nad pogačun“, budi zadovoljan da ga imaš i ponavljaj va sebe del molitvi - Kruh naš svagdanji daj nam danas!