Danas je blagdan Male Gospe - Marijica, letu sej' prišuljala jesen svojemi kolorami, svojemi mirisami, svojun zanosnun lipotun.
Naglo je prišla prva rujanska kiša, otirala kupači zi plaž, oplahnula cesti i skalini, mel na plažah, bura j' ohladila more, samo se kuražni upute prama moru, još malo za gušt, za zdravje, za oproštaj z moren. Odletele su lastavice. Užali smo va ovo vrime guštat još va tepline sunca, reć bi va babljen letu. Ali ona stara znana - nakon Vele Gospe i Male Gospoje, nakon prvoga dažja, letu je kraj. Vrućini su prestale, već se i dekica išće večer za pokrit. Zahladilo je.
Grozje je obrano, visi još kade ki grozd, slade se drozdi, smokvi su rano sazrele, već jih sušimo na reštah, a ove ča su sada još na drvu su slatke kot med, gušt jih je jutron otkinut i zasladit se. Dečina su krenuli va školi, materami i ocami vele brigi i troški, a dečine torbi teške kot da su za študenti vele knjigi. Pitaju se miće glavice, čaj' ta torba tako teška, ča me to va škole čeka? Nabavljaju se drva, zazimet će ovo leto ranije, rekli su Sijerković i Vakula, rabi se oskrbet za zimu. Negda smo kupovali i zimnicu, kompir, kiselili zele, danas zimnica čeka po robneh kućah, sega ima čagod ti rabi, samo soldi. Navlačimo tepleju robu, bi reć obučujemo se slojevito, ako se sunce pojavi rukav zdolu. Rumbrela je obavezan modni dodatak. Vrime je od dažji.
Žal nan je semi sej' „Ribarski tjedan“ naglo prekinul. Još su rabile bit dve, tri fešti, pa klapa – „Rišpet“, i velo finale uz vatromet. Nikako pravo vrime ćapat, za ovo leto smo sten finili. Lipo sej' neku večer čula čakavska beseda na 3. „ČAfestu“, kantali su i tancali, recitirali, naši čakavci i prijateli z Bribira, Bakra, Liča, Grižan, Selac. Zvonilo je naše lipo ČA obalun se do vrha paladi i opraštalo se z leton, z barkami, z fureštami, moren, trgon još vavik punen. Ovo je bil regal za domaćeh, fanj jih je prišlo gljedat tu lipu večer dok je zi Vinodolske prihajala friška arija.
Pametit ćemo ovu sezonu po gužve, po kolonah va Tomislavovoj, po prometu va kafićeh, restoraneh, po eurićeh ki su se zaslužili delajuć z apartmani. Saki je neč zaradil i more bit kuntenat, neće više morat dežurat doma na recepcijah. More se poć prošetat uz obali brez vele gužvi, penzići su se obrnuli zdravomu životu pa šćapami i brzen hodon (nordijski) put Macela i održavaju kondiciju. Vježbaju na Tribaljsken jezeru. Bit će oni spravni za zabavi, izleti i susreti. Mladi su va školah, fakulteteh, neki su trbuhon za kruhon šli put Njemačke, Irske. Takova nan je sudbina, ostaju nan gradi bez mladosti. Žalosno. Kako nan je tako nan je, niki se ne buni. Samo daj Bog zdravlja, još ovo malo života, redovite plaće i penzije. Sudbinu nan drugi kroje, borimo se saki zase.
Crkvenica se pripravlja za novo razdoblje, za prazne cesti, za škurinu kad se zapru kafići uz obalu. Puhat će nove bure, jake juga, kiše na galoni, prama prognoze - duga mrzla zima. Spravit ćemo drva, zapret se va kuće, spat zimski san, ko medvedi. Odmorit te ugostitelji, turističke zajednice, utihnut recepcije. Gumeni flamingosi i druge beštije od plastiki ke su zauzimale veli dio plaži, finit te va bajah, ručniki se nete rastezat po plažah, rondulat će se pešćace va moru. Carevat će jesen po parkeh nad moren, nad Crkvenicun.
Gre nan novo vrime, mira, jesenskeh maglic i pobiranje blaga ča nan zemlja daje. preživet ćemo i ovu zimu, a na proliće - Jovo nanovo.
Zdravi i veseli bili !