Pasanu šetemanu va ričken malen kazališću na Sušaku penzioneri su mogli uživat gljedajuć predstavu – „Kalafat, batana i papagala“ - poklon Županije penzionerami i svojin starijin sugrađanimi uz Dan starijeh osob.
Guštali smo gljedat tu lipu teplu štoriju o životu staroga kalafata čije su ruki izgradile silu barak za života. Ruki već drhću, tugun se spominje na pasano vrime kada je još bil moćan delat, živet, volet. Sada va staroste čeka na rešenje o penzije, da mu pošćer prnese poštu, da š njin popije žmulj vina i da malo poćakulaju o negdanjemu životu.
Lipo je bilo poslušat stare poznate pjesmi našega kraja, kad bi zakantali na našoj lipoj i mehkoj čakavice. Jedinu kumpaniju mu je delala papagala, ka je znala i ku besedu reć, pa j' to bilo baš i smešno. Spametil bi se stari kalafat kako je gladil barki ko divojki negda po bokeh i po telu. Malo bi i zakimal na klupe kada bi ga svladal umor i sanjal da mu je njegova papagala prišla va san ko lipa ženska, vas se je smutil ča od vina ča od umora a bome mu je i ona glavu smutila okol njega se pletuć.
Malo san se i ja spametila i pozabljeneh besed i alati kemi su se batane delale. Treger, rašpa i batić, od alata kasunić, blanje, čavli, oblice, škermi i pajoli i timuni i kavaleti. Na glave ćepica, va usteh ćiket, za uhon debeli lapiš. Stomanja od flanela na kvadrići, trliš vezan špagon okolo pasa, na nogah šupi postoli. Vas ofarban piturun i pokrpan na veli punti, prsti omotani facolićen aš su od pili nastradali. Se okolo nahitane grube daski, pilotina i sitne trešćice. Se je dišalo na smolu borovini i katran, na kolu i štanj, aš saki je komad moral bit dobro zaštanjan. Batana je barka ravnoga trupa, moglo se š njun i na plićen moru ribi lovit, puno lačneh ust ribari su š njun mogli familje prehranit. Venecijanske gondoli, neretvanske trapi, komiške sanduli kot batana su slične feli.
Proširili su jih graditelji zi Talije do Istre i Dalmacije, ma ni jedna nalik na drugu. Ni po veličine ni po dužine. Građene su va konobah od kuć pa je prama veličine prostora i drvene građe, zišla veća ili manja barka, neka bi bila 4 metra duga a neka i do 8 metri. Krasili su jih kvadrate jadra i narisani znak ili grb od familje, da se j' zduga znalo čija je. Ofarbane jadra zeleno, žuto ili črljeno. Građene su od više vrst drva. Kostur od trdoga hrasta, a oplata od mekšega, bora, jelvi ili smreki. Gradnja je durala nekuliko miseci a život barki do stotinu let.
Saki kalafat i graditelj barki obnavlja stare već oronule va maleh škvereh, udahne njin novi život, načine od njih novu lipoticu, pogladi ju po oblen boku, pa more durat i bordižat i daljnjeh sto let. Drži se do njih. Jedna je i va našen, nekuliko va selašken i jakovarsken portu. Batane, pasare, guci i druge drvene barki su obnavljane i kot kulturno blago zaštićene.
Ako imate priliku, pogledajte predstavu,i zvrsna je, glumci, pjesme i štorija!