Se ako je prama prognoze vrimena proliće već prišlo, sunce još vavik škrto tepli ozeblu i umidnu zemlju tešku od silne kiše ča je dugo i uporno padala skoro saki dan. Zaželeli smo se one lipe teplini i aromi rascvaleh rožic va arije, zima nas je prevarila i dosti smo se smržnjevali. Ljudi su bili na čudu, drva su se trošile, rabilo je ložit a ni jih bilo nigde za kupit. Ako je, koštale su ko suho zlato. Vazam je ovo leto prišal rano, dosti je turisti posjetilo Crkvenicu, bilo je sakakoveh dogajan pa je saki našal neč za se i užival va toj lipote, a pogotovo oneh dani kad bi se sunca malo pokazalo i steplilo nas.
Ni marčene bure nisu ovo leto zapuhale kako bude užanca, tri puti. Teški tamni oblaki zasuli su na tone snega po Gorsken kotaru a i do nas ga je vetar donašal. Va ovo vrime su naši stari već hodili na grunti prekapat i gnojit zemlju, pripravit za sadnju i sjetvu. Kada je ovakova umidenca i zemlja teška za prekapat vilami i lopatami, muži bi navlačili kaljače i čizmi i šli orezat trsi, raščistit prolazi do vrti od diračja i šedrki i bodljikaveh grmi čredulj ke su se rastegle preko gromač da njin ne pače.
Zato je okolo kuć i po umejkeh bilo najlipče čut črčanju i vrisku dečini. Kot male tice na nebu oni bi se tako razletekli po livadah. Od mićeh nog čuvali su oni ovčice i kozice i igrali se sakakoveh igar. Ni bilo soldi za kupit igrački pa su oni zmišljale svoje igre. Čin bi prišli zi školi, naškrabali zadaću i trk van. Život od sela do grada se razlikoval ali dečje igri bile su jednake.
Divojčice su se užale igrat na učiteljice dok bi njin manja braća i sestrice bili školani. Matere bi njin zašile pupi od šareh krpic pa su za njih kuhale obedi va mićeh šupeh lončićeh i komadići staklini. Igrale su se na butigerice i tobože prodavale verduru, sakakove sitnice ča bi prnesle od doma. Igrale su se i na ženidbi, plele venčići od cvatućeh rožic, obučevale stare materine halje. Mesile su zemlju pilotinun i zamišljale da peku krušići. Ogradile bi kamenen svoje kuhinje i sobi ili se skrile pod kakovu voltu i totu igrale.
One su se još užale igrat na "školicu" narisanu na betonu i nogun rivale pljočicu od cigli ili kakov kamičić zi kocki va kocku do neba, kada bi bile spašene. Igrali su se i špekulami i gajali va skopane škuljice. Nisu vavik imeli špekulu nego kakov obli kamičić ili šišvić od bora. Ki je imel špekulu od stakla, a tek porculanku poslanu z Meriki, bil je va dečjeh očeh bogataš. Rada su se igrali na skriva, na lovit, a kad bi njin oci svinili žicu tako da bi tirali pred sobun obruč od bačvi to su bila natjecanja. Ki bi usp el nizbrdo teć i zadržat obruč va žice bil bi heroj. Deški bi se pljezvali po oreheh preskakali gromači i vavik imeli krvavi sinjali po koleneh i lakteh. Vavik su njin se matere grozile da će dobit baket kad pridu doma. Doma se j' moralo prit do zvonjave Zdravo Marije i to je bila zapoved.
Tako je teklo vrime, odrastali mići va mladići, dorastali novi mladi tići. Saki va svojen dobu i prama štajon je igral iste, one negdanje igri, keh se puno od nas starejeh rada spomenje a današnji dečina ni ne znaju kako smi se mi negda igrali. Zato su totu nonići ki njin neka o tomu prave štorije. Najlipše j' bilo čut kad bi selon ili ili po livadah deškići fikali na filkalci žmižljeni od jasena ili jorgovana. Grančicu dugu do dvanajst centimetri bi se na jednen delu duboko zarezalo. Z pacijencun bi se tuklo - mižljilo drškun od noža dok ne bi zišla pena i do polovice odvojila kora od drva. Na drvu bi se zarezala kosa škuljica - pisak, na jednoj bande i va sredine i kad bi se navuklo koru nazad na drvo i kroz nju bi se sun forcin fikalo. Isto su se tako mižljile i trumbetice samo od kori, pa bi svirki bilo od sakuda ča je i staromu i mladomu uhu godilo čut.
Kad zafiču fikalci bude se uspomeni na tempi pasatti.