Jesen se polešto prišuljala va crikveniške kali, prvun rosun poškropila krovi i travu, mahnula je već požutelomu i uvenjenomu peru na trseh, pokidano je grozje, a čvrčki su utihnuli.
Čini mi se ko da je prišla va jedreh i na jarboleh "Kraljice mora" jahti ankorane na vrhu paladi. Galebi su pobrali zadnje mrvice leta po sprudeh plaž i obali pa se odmaraju na vrhu paladi sedeć na mrgiljeh. Vezane su barki i jahti va portu, dečica teku po pešćacu uz more, skupljaju regali od mora ča jih je more van hitilo, školjkice i pužići. Va arije diši more, diši jesen nekako posebe lipo, na daž jesenji, a od zadnjega veloga potopa još se suši zemlja. Čerašnji sunčani dan zimamil je sunce nakon oblaki i grije još teplinun. Crkvenica i ljudi guštaju na tepline sunca, a ono zahaja se raneje i šalje ranu škurinu nad grad.
Jesen nan nuti najlipši kolori, se nijansi žute i kafene, zlatne. Kade ka suha smokva visi na kitah siveh drv, kosi se njimi slade, smokvi hitaju zadnje pere. Na balkoneh se luftaju deki i kušini, tepihi. Finila je i ovasta sezona, još se vide kadeki furešti, obučeni još va kratki rukavi se ako su jutarnje temperaturi već naveliko okolo dvanaest celziji. Dani su još tepli, sunce zna steplit, gre kraju rujan, a zavladat će listopad i pokidat zadnji listi na drveh.
Volin jesen, radi njejeh kolori, radi plodi ki su sazreli na jabukah, hrušvah, oreheh, trseh, radi buć i zreleh sliv, zreloga kukuruza, radi kostanji ki padaju zi stabal. Volin miris pekmeza od sliv ki se kuha va padelah. Volin onu šaru gužvu pred školun kada dečica teškemi torbami kreću put školi. Veselo črče kot lastavići ki su već pasali put juga, kot mali dživi ki su sada zavladali dvorištami i livadami i zoblju plodi na klasju. Ma lipoti jedne.
Neka nan još bude lipeh dani. Bit će dosti magli po stranami Gorskoga kotara, kiše nad Učkun, potok ki se puni dažon. Naš Potok se spaja pod moston z moren, grle se, a ugori plavaju. Po konalu barki ankorane ili na panulu, a ribari stežu plavice i kadeku lignju. More se mreška, leno se rastežu vali put mela na plažah. More čeka na juga i bure ke te prit i nete nan mira dat.
Se va svoje vrime, leto pasalo, jesen prišla, aa i zima će. A čovik se neka veseli onomu ča va semu tomu vidi lipotu i gušt. Uživajmo va zadnjeh zrakah tepline sunca, va odsjaju mora, va parkeh ča još cvatu. Neka caruju kolori, aš kad pride zima se će bit va nijansah sive. Lipi nan dani želin, aš se tako prešno pasa.
Zdravi i veseli bili.