Va jednen mićen primorsken glagoljašken klostru med starun kramarijun našli su hićeni starinski pisani rukopis. Napisan je naslov - Gaštronomija. Već nagrižene od miši i starini, napol zipraneh redi, izloženeh umidece od kiše ka je močila krozi napukli žlepci. Pisana je teškun rukun, opismenjenoga brata priučenoga kuhara ko pouku malomu od kužini ki je pomagal okolo kuharije. Gaštronomja je bila zapiševana va glagoljašken samostanu Sv. Magdalene va Portu, va Dubašnice i potiče negde od XVII stoletja. (Za uvod rabljeno par besed od Branka Fučića).
Ne reče se badave ča ostane va kamik uklesano ili na hartu zapisano da će se kada tada nać i rabit ko artifakt pasanoga vrimena. Va ponude našeh restorani i oštarij nute se sakakove jila. Bogat je meni, čak i naslikane porcije zi keh špijaju šakmpi na buzaru, oradi na gradelah uz obaveznu blitvu na domaći, kuhani kompir, bruditi, školjki na sto mod, rupice. Najdu se totu i sardeli i običneja hrana - batuda, fažol i pašta, maneštre seh mod. Obavezatni su ražnjići, pljeskavice i ćevapi, pomfrita i malo kapuli. Za sakoga neč.
Naša je hrana bila jednostavna, siromašna, ča se je imelo va vrteh bi se spravilo za stol. Riba je bila čest gost na pijateh, ribarili su naši stari, prehranjevali brojnu familju, lačnu dečinu. Imelo sej' doma i kokoše, race , biloj jaj a i friškoga mlika od kozic ili ovčic. Praščevini i usuho i ufriško je imela saka kuća aš su se prasci gojili va koceh. Bilo j' i kompira, sakakove verduri. Matere i noni vavik za šparheton, nedeljun više mesa, kakov god jednostavni kolač, šetemanun fažola na sto mod. Siti i kuntenti, glavno da je štumig pun.
Danas se vraćamo na "retro" va semu pa i va kuhanju. To je interesantno za furešti pa i oni to rada pojidu. Crkveničke rupice, po selaški kolubice, postale su naj jilo. Se feli rib, pašta s toćami. Pitan te ja ki ne bi rada pojil bribirski makaruni, prisnac od blitvi, šuljki, jašmik i fažol, natrenu kašu. Palenta je česta na pijateh uz toć od bakalara i brudita. Zasladit se pogačun, bazlamačun, puhancami i fritama. Ma ki gušti. Mešaju se ponudi i zi seh okolneh kraji, blago nami da je takova bogata ponuda.
Se ako se med našen jilon zameša i ka pizza, škampi na pariški, šnicli na bečki, norveški škampi, japanski lignji, tuna zi uzgoja, se se to pripravi va kuhinjah žvelteh i vičneh kuhari, restorana na glasu, skupa ili jeftina se je to gaštronomija.
Danas je petak, na stolu je blitva i ribi. U slast, do drugi put.
Zdravi i veseli bili !