Rodit se uz potok poli malenice, rast, delat prvi nesigurni koračići, padat pa se dizat, jušto je jedan mići del lipoga detinjstva i odrastanja nas ki smo kot mići jarčići tekli livadami okol kuće, do potoka, do stare murvi va sred dvora, oreha na komu smo se vogali i hrasti po keh smo se pljezvali. Bilo je va ten delu Crkvenice dosti dečini. Prišli bi dečina z pod Kotora, spušćali su se i zi Kalvarije i dela Vinodolske, rada bi šli va veli dvor ozada kući kade je bilo sakakovoga blaga pa se šnjimi natirevali.
Posebe je kraj uz potok bil lip kad bi finili mrazi i zimi, a va zraku se ćutilo pramaliće. Već bi dugačke grani tužneh vrb uz rubi potoka močile va studenoj vodice. Zelene perca su špijale van zi pupići čekajuć malo jače sunce da jih osnaži i zimami van. Na mesteh kade su rasle žukvi već su se nazirale miće mačice ke smo jako voleli pobirat. Divojčice su se igrale pupami, padelicami, ko da kuhaju, mešale bi perca od črne gorice, javoriki i maslini. Deški su natakali krpenjaču nabijajuć ki će jačen šuson pogodit va gol med dva kamika. Dečje vriski na saken koraku, veseli smeh ili bi se drečili ki bi oderali kolena na gruhu dvora rivajuć se za balun.
Najdraže vrime je bilo početkon marča. Fijolice, cvetići mali plavi prve bi najavile proliće. Mamile nas svojun lipotun i profumom, va suhoj travice sramežljivo skrite. Nabrale bimo bokašca i tekle doma nosit materan da jih razveselimo. Jedno bi nabrale i za nonu a njeje nagrišpano lice bi se tako lipo nasmelo i va staračkemi rukami čuvalo bi fijolice kot najdraži dar.
Kad bi se bližil osmi marač - Dan žena, Majčin dan, već kako ga je ki zval mi divojčice smo z puno pacijenci trgale one škure fijolice ča su cvale po kantunićeh vrta. One su posebe lipo dišale i onako ko od veluda va lipen bokašcu ponesle smo jih učiteljican. Ni bilo soldi za kupit skupi regali, morebit kakovu vazicu ili sitnicu za kuću ali i učiteljice su bile jako vesele kad bi dobile te bokašca i puneh su ruk hodile doma da njin krase i zadiše kuću. A divojčice vesele ča su se njimi malo umilile.
Oveh se dani ženi već parićuju za proslavi 8. marča. Spamećuju se kako je to negda bilo, kako su i one ko miće pobirale fijolice i nosile materan. Kako su ko mlade ženi imele naviklani vlasi, bolje halje i lipši postoli za proslavi va domeh. Prilika za pokazat se va lipšen svetlu. Po hoteleh i domeh bit će veselo, tancat će se do kasno va noć. Kad se ženi zabavljaju, e to su onda fešti, lipo urejene va svečanen ruhu. Kako god bilo, neka ženi uživaju. To je njihov dan. Kigod muž će po skrivećki kupit kakovu ružu a ja ću se najviše veselit bokašcami ke će mi va vrtu nabrat moje vnučice.
Živel, živel osmi marač ! "Dan žena - po negdanju", Majčin dan.
VESELE I ZDRAVE BILE !!!!