Jesen stiže dunjo moja al' još fali žuta boja, orehi i mlado vino - to je život, to volimo. Kantali su trgači grozja po vinogradeh dok je bila trgadba, a trsi rastežu svoje ogoljene grani na zadnjemi zrakami sunca, kada je listopad se bliže, a pere već žuti, vene i otpada. Mlado vino se već otače va podrumeh, rumeni se ili zlati već od kakovoga je grozja zmašćeno. Lete vinske mušice, bocuni čekaju na policah da jih gospodari napune kad otoče mlado vino. Gospodari su kuntenti, i kako se čini, vina te bit dobra i bogata okuson, smeju se i vesele aš ča su trsu dali va slatken moštu i vinu se vrne.
Ni lako delat okolo trsi, okolo vinograda, ne reče se badave da - trsje rabi slugu a ne gospodara, rabi ga okapat, orezat, gnojit i pazit. Pripravne su botelje, bocuni, traturi. Vino se zi bačav pretače va staklenki, da bi od sunca dobilo zlatni kolori od mihurići. Kada se pretače da se delaju krunice od peni na vinu. Kuša se mošt sladak i rezak. Nonići po skriveć od mater daju malo popit i dečine. Aromi vina i pečeneh kostanji mešaju se va arije dok mat peče štrudeli od tek dozreleh jabukav. Smeju se i dečica, guštaju, to njin je prvi gutljaj ki je sladak pa se lako pije.
Treba proslavit točenje mladoga vina. Poli nas su te užance više poznate okolo Riki va Kastavsken kraju. Pamete i pišu va Kastavsken zakonu slavi se mlado vino i ko blagdan od hiljadu četiristotoga leta. Tamo su prave fešti. Duraju po šetemanu dani, toči se belica, jidu se pečeni kostanji, ji se kiseli kapuz i kobasice i sakakove delicije. Natječu se vinari da osvoje najbolje vino berbi 2017, dobivaju se nagradi za najlipši grozd, za najlipše urejenu okućnicu. Samanj je totu. Nute se starinski alati, drvenarija, rakataži, kuhači, kablići i kabli za mastit grozje. Ima totu i glineneh zdel i važi, dečjeh igračak a ki ne kupi petešića od keramiki komu se vrit puše, ni bil na sajmu.
Rada gredu naši ljudi va Kastav za Belu nedelju. Zač Bela nedelja, aš počinje prvu nedelju va misecu listopadu, prvomu jesenjen misecu. Toči se mlado vino, na beli pondeljak se slavi, nazdravlja a kanat se ori. Ki more neka gre, veselja će bit na saken koraku. Kogagodre ćeš trefit, poćakulat, ki žmuj popit i čagod pojist. Poć ćeš doma smućen od mladoga vina ma kuntenat. Užaju muži reć - neka žena doma vozi! Kastavci su dobri domaćini, vole da njin se pride. Zato ženu va auto i va Kastav. ko pak žena voli malo popit, neka vozi ki je trezan.
Va momu vrtu cvatu rožice lipoga imena - Bele nedeljice. Moje su svetlo-modre, ima jih roza i beleh. Lip je to cvetić ča voli cvast va našeh vrteh naslanjajuć se na zidi od kuć ili va važeh po dvoreh.
Vesela van i sretna Bela nedelja.
Va krajeh ki su poznati po vinu uža se reć - Deca su ko mlado vino, steju ko i vino. Do otakanja o Martinje, homo va Kastav.
Živi i veseli bili pa se malo i napili.