Prva nedelja va listopadu poznata ko "Bela nedelja" - nedilja, nedeja, va našeh krajeh "Bela nedelja" va našoj okolice, a pogotvo va Kastve i (a i bliže nami va Križišću) se slavi ko blagdan od beloga vina - belice, beloga grozja od koga se dela jako dobro belo vino. Tamo užaju reć - blagdan od vina vrednejega od zlata i fešta od staroga zanata - samanj od stareh zanati od drveneh kablići za mastit vino, sakakoveh igračak od drva za dečinu, limenarije, slikarije, štikarije. Vesele se ljudi pijuć i nazdravljajuć lanjsken vinon od belice. Na se se strani kanta i tanca i va jilu uživa. Prava fešta. Ki ni nikad bil, rabi poć i to doživet. Va to vrime cvate jedan lipi cvetić, lilaste - svetlo plave farbi, ko mići grmić nahitan rožicami. Va primorskeh krajeh ga zovemo - Bela nedeljica. Malo ka kuća nima ti cvet. Zaprave bi ga rabila imet, aš to je fetiva tradicijska rožica. Va mojen važu procvala je jušto na vrime pa i va vrtu moje pajdašice Željki Pavlić, obilata i jako lipa. Litratale ju smo pa vas sada želimo podsjetit kako nan va vrteh rabi cvast.
