Lipi sunčani dani jutron mrzlinun obučeni, a noći vedrenice nebo zvezdicami okićene. Misec gljeda ozgora se veći, kako gre prama Božiću bit će pun i ko nonina pogača žut. Va zraku se ćuti radost došašća va punoj svojoj lipote. Gredu ljudi zi zornic, veseli i smehon na obrazeh. Obavili su jednu lipu užancu kantanja lipeh adventskeh napjevi i molitvi u čast nadolazećeg rojenja maloga Isusa - "Visom leteć ptice male, našem domu zapjevale. Srca gore, evo zore, srca gore evo zore"... dugo ozvanja va ušeh i tepli srca dok mrzlina šćiplje za obrazi.
Sveta je Lucija pasala, poseli smo šenicu, pomalo već treba se parićat za Badnju večer kad će se okitit božićnjak, jelvica a negda šmrkvica. Va familjah je bil običaj da otac ili nono gredu put ljubavne cestice ili put stran Kotora. Iskali bi šmrkvicu ka je imela lipu formu da čin više sliči na jelvicu. Pripravili bi i panj, zdubili škulju i drvce zaboli nutar. Domaći na kupu farbali bi orehi i šiški va srebro ken se mazalo roli na šparheteh. Veselili su se dečina ki je lipše ofarbal a ručice bi njin bile se od srebra. Komu god je i nosić bil posrebren.
Mat i nona već su pekle galetice ke bi se na Badnjak obesile po kitah božićnjaka. Hodilo sej' poli Vampuli kupit baškoti, našal sej' ki dinar za kupit narančice i jabukvice. Z Merik bimo va paketeh dobili i ku bućicu, na njih smo pazili da se ne razbiju. Va vatu smo jih zamatali. Isto tako i jaslice od hartuna ke bi se pod bor na mahu složile. E, to je već bil mirakul. Od sega ča s nostalđijun pameti puno od nas su svilni bomboni. Zvali smo jih svilni aš su bili lipo upakovani va beli papirići na krajeh sitno narezani, a okol njih od stanijola razneh kolori, zeleni, črljeni, zlatni i srebrni. Nutre je bila štangica od cukara tako lipo zapakovana. Danas jih se more retko nać ma neke butige jopet vraćaju ti lipi cukarani ukras. Osin balotic - bućic, svilni su bomboni nami dečine bili najdraži. Bilo j' dugo čekat da Božić i Tri kralji projdu da se šmrkvica raskiti pa da ki svilni bombon i dobijemo. Braća su bili pravi maheri za kamuflažu. Otvorili bi papir, stavili kakovu trešćicu i nazad bombon da samo figura. Jadila bi se mat ma ni bilo pomoće aš bi nestajali kad si zaspu po noće.
Bile su to vrimene kada smo koječesa bili željni. One naranče su tako lipo dišale, jabukvice onako črljene vukle da jih zameš. Ma čekali smo da se božićnjak okiti, da kuću krasi i lipo diši i mami. Nona j' čuvala na skriten mestu menduli, orehi, malo bi potrošila za slašćice speć a i načinila mići paketići i ku čikuladicu za regal pod bor. Kad bimo raskitili bor, pojile su se galetice, podelile narančice, va složnoj familje sakomu jednako a najprvo najmlajemi. Nikad nećemo pozabit ti slaj i tu aromu narančic i cukaraneh svilneh bomboncini.
Da se ova lipa užanca starinskoga, negdanjega slavljenja Božića ne pozabi već par let se va Adventsken parku održi prikaz - "Božić po negdanju". Baš onako kako rabi, da se mi stareji spametimo i obnovimo sjećanja a mlaji da nauče kako je to negda bilo. Za to se pobrinu zaposlenice Grackoga muzeja Crkvenice i velo njin hvala na ten.
Ne znan ča će pripravit ovo leto. Škoda da se to zapušća aš bude lipo, jako lipo.