Si sveti
Dani su pred Si sveti,
daž žalosno dažji.
Ljudi i ženi put cimitera gredu,
pune ruki rožic imaju
svojeh pokojneh grobi gredu
uredit i sveći važgat.
Na cimiteru je puno grobi,
tamo počivaju naši najmileji
zi ancipresi se daž toči,
ko suzi tira kapi na oči.
Va srcu tuga i spominjanja,
saki spomenik svoju besedu zna.
Ljudi mučeć rožice postave,
sveću važgu i mole.
Zi crikvi se zvona čuju,
večeras žalobno kampanaju.
Lumini va svojen miru gore,
plameni drhću saki plamen za svoju dušu,
saka suza za svoju tugu.
Nekemi su ovde nono, nona, otac ili mat
nekemi muži, hćere, sini, sestra ili brat.
Saki od nas svoju zna,
misleć moja j' tuga najveća.
Daž se po lumbrelah toči,
tira suzi na oči.
Ovde su moji stari i dva brata mila,
lahka njin semi hrvacka zemljica bila.
Se ča za njih moremo učinit,
sveću važgat, za njih se pomolit
i nikad jih ne pozabit.
Uz blagdan Seh sveteh i sjećanje na seh ki su pasali na oni svit... Počivali va miru!
Slavica Car Frišova
(iz knjige "Kolori od života")