Va mrzloj zimskoj arije proleću mićahne pahulji snežića. Nošen ozgora zi Planini spušća se na mehki umejki griško-belgrackoga kraja, preleće lešice i smokviki, na zaspali trsi zmržnjenu zemlju se do Crkvenice. Puše, studena bura zavlači se va kantuni okol kuć i va dimljaki pa fijuče i straši. Va kućah familje spe blaženen snon, stareji sanjaju neke pasane vrimena, a mlaji va snu prebiraju regali ki bi njin mogal Mikula prnest. Ziluštrali su škornjice, ki je imel, klal je čižmice, i lipo poslagali na daski od poneštar. Nać će otac ki dinar za regal kupit. Prozori okovani ledon, vane j' takova oštra zimska noć, da se va posteljah stišću jedni uz drugeh, a mat se diže sako tuliko klast po ki panjić va šparhet da se žar drži i kuću tepli. Potok protiče polešto uz Malenicu, duge kiti tužne vrbi moče se va studenu vodu ko vlasi i kaplje se lede. Ovo je leto zima posebe ledena. Malo je rano prišla.
Dan za danon va ovo vrime neki je dan ki narod po užance poštiva. Na četrtoga pride Sveta Barbara, zaštitnica oč i očnoga vida. Za njun šestoga najdraži dečji svetac - Mikula. Za njega se reče daj' patron ribari, pomorci, siromaji, putnici i dečini. Pomorci hodočaste put Trsata, va Kraljevice va crikvu svetoga Mikule i mole za dobro more i sretni vijaji.
Spametin se vrimena kad smo bili dečina, kako bi nan Mikula i krampusi obahajali kuće po Vinodolskoj i okolo po Crkvenice. Vavik sej' našal neki ki sej' obukal va belu veštu, bradun od vati ili kudelji. Na glave je imel papinsku kapu a vrukah srebrni šćap. Krampus je hodil šnjen va kumpanije i rošćal ruzinavemi lancami. Ajme, kako nas je bilo strah, skrivali smo se zada noni, aš je ona bila najšira, Mikula bi nas pogladil po obrazu i dal ki mići regal zivlačeć ga zi košari. Ki ni bil dobar dobil je od krampusa šibu. Neki od nas su i rulili, šćipali nonu za ruki da bi bila puna plavic. Kako je Mikula poznal su dečinu i znal njihove mani, morali bi ga molit da njin oprosti za ono ča su bili zločesti. Morali bi zmolit Očenaš i isto bi dobili regal ma kad bi videli oni tepli i dobri pogljed od Mikuli bi se valje i umirili.
Sveti Mikula je bil dobri biskup. Živel je va 4. stoliću, porijeklon iz Mire, grada Patare va Maloj Azije. Živel je va vere, odan Bogu poučaval je Evanđelje. Va Evrope ga štuju ko sveca od 14. st. Bil je poznat po dobrote. Stareji su nan pravili kako je va jednen mićen siromašnen mestu živel čovik ki je imel tri hćere. Bilo j' vrime da se jedna po jedna žene, ma ni bilo soldi ni za spravit dotu ni opravit divojku. Biskup je za to čul i ostavil je na poneštre vrićicu dukati. Kako bi se ka ženila tako bi jopet stavil vrićicu. Divojki su se poženile i srićne bile. O tomu se doznalo pa je za dobročinstva ka je udelal proglašen sveten. Otada i postoji užanca poštivanja Svetoga Mikule.
Pomorci mu se mole za mirno more a ribari za bogati ulov rib. Hodočaste kroz Riku put Trsata va zavjetnu kapelicu ili va crikvu Svetomu Mikule na svečane maše prihajajuć na brodeh moren put Kraljevice.
Ovako gre i jedna moja štorijica:
Ki to tapa, ki to gre, va belen kapotu. Belun svetun kapun i srebrnen šćapon, smehon na obrazu, dobrotun va oku.
Sa deca ga znaju ko dobrog čovika, veselo ga čekaju, malo j' do Božića. Dari dobroj dece nosi, onomu ki je dobar puno lipih slašćica, a ki je nedobar pozlaćena šibica. Na poneštre čeka oglancana čižmica.
Pročitajte ovo svojemi mlajemi.