Danas je sveta Lucija, kršćanska mučenica i sljedbenica istinske vere i zaštitnica siromašneh i slabovidneh, slepeh, vida i oč.
Sretan je onaj ki zdravemi očami gljeda su lipotu okol sebe, a nesrićan onaj koji je slep poli zdraveh oč, a ne vidi oko sebe potrebite, nesrićne, bolni ljudi, ne vidi cvet, tice, more, kolori, zapadi sunca, rajanje zore, mogućnost čitanja i učenja. Ne vidi svoji najbliži, njihove lica i smeh na obrazeh. Budimo kuntenti da imamo tu najvrijedneju odliku s čovjeka i molimo se sv. Lucije da nam sačuva dobar vid i oče.
Va narodu se vezuju užance keh se rada držimo. Rabi poset šenicu ka će bit lipa i zelena i krasit jaslice pod jelvicun. Neki malo popreše pa poseju šenicu na svetu Barbaru ili Mikulju, ma najlipše zelena bude ona na Lucijinu posejena. Va pijatići, miće zdelice rabi klast zemlje, one črne humusne, prosut po njoj šenicu, malo zalet vodun i već treti dan počnu zihajat miće kljice pa do Božića i mlada šenica. Ona je znamen plodnosti na poljeh, obilje va familjah, a lipo ju je i videt. Uža se poset za sakoga člana va familje jedan pijatić, da se gljeda kakovo će bit leto, napredovat i krešit dečica. Ja jih iman deset Bogu hvala.
Lipa je to užanca, o koj najviše skrbe noni ili matere. Dečine puste da ju zalevaju. A oni mere saki dan kuliko je narasla. Kad se okiti jelvica, posloži se med jaslice i zelena šenica pa je to lipo za videt i veseli nas. Va nekeh se mestah veruje da i Lucija isto prnese dari pa deca višaju po kuće kalcetice. Va Italije ju zovi la Befana - dobra vještica ka nosi dece slašćice va ostavljene kalcetice. Vesele se dečina va oven vrimenu kada caruje prosinac, zaprave nazvan prama prošenju za dobre nakane i dolazak Isusića i slavu Božića.
Ki more, stavit će va čizmice, kalcetice i mali dari pod bor. A šenica neka nan semi bude zelena i lipa, neka nan donese dobro novo leto, zdravo i obilato. Neka mir caruje, neka se ljudi vole i familje okupljaju, začas će pasat još ovo malo dani do Božića pa jih provedimo va dobru i miru.
Prit će i novo leto, pa Jovo nanovo!