1 - Mirjana Klement na predstavljanju svoje druge zbirke pjesama
2 - Profesorica Marija Gračaković
3 - Neli Barac
Kad je ura na turnu znad atrija kaštela odbrajala osmu uru, a predvečerje jednoga lipoga dana spušćalo je polešto svoje koprene noći na brojni ljubitelji čakavske besedi, počela je jedna lipa pjesnička večer naše pjesnikinje Mirjane Klement.
Va tu pjesničku večer je svojen zvonken glason uz gitaru uvel kantautor Neven Barac i već na početku razveselil svojemi versami. Kako je već užanca va prven delu govorili su u ime nakladnika Katedre Čakavskoga sabora "Kotor" Crikvenica Ksenija Car Ilić zahvaljujuć se semi ki su pomogli da ovi libar bude ukoričen i recenzentica knjigi profesorica Marija Gračaković, spominjuć kako je druga zbirka versi pod imenon "Zauzdana čežnja" puna tananeh osjećaji ljubavi va saken obliku, osjećaji zvučeneh iz dubine srca i teple duše za svojeh najbližeh, za svoj rodni kraj za more, za saki njegov kamičić za saki val, za saki del života kroz ki je pasevala, za saki zagrljaj uzvraćen od voljenoga čovika, sini i vnučići, živeć život sa semi njegovemi srićnemi, veselemi i gorkemi momenti. Nekuliko pjesam pisano je na standardu ča Mirjanin libar obogaćuje.
Knjiga je to, ku saki rabi zet vruki, uživat, va njoj, nać del sebe i ono najvažnije našu besedu i ČA ko zi sakoga versa špija.
Profesorica Marija Gračaković je napisala:
- Da je zbirka poezije Mirjane Klement u kojoj ljubav i život koračaju ruku pod ruku - idu zajedno. Zbirka je to u kojoj gotovo svaki stih gordo i sigurno brodi na valovima lirskog senzibiliteta ... Učini mi se da pratim let leptira, koji me očarava krhkošću, a Mirjanina je poezija je poput toga leta. Duboko iskrena i osjećajna. Dirljiva. Ispovjedna....Autoričina poetska nadahnuća možemo okarakterizirati kao bdijenje nad samom sobom.... Svaka je pjesma jedna slika, jedna situacija, jedna impresija ... Ona je utočište za svakoga za svakoga koji se ikad, na razmeđu sna i jave, prepustio ljubavi. (iz recenzije)
Va programu su u sudjelovali i Neli Barac, Nino Bijelac, te sama autorica čitajuć dojmljivo ove lipe pjesmi. Neven Barac uglazbil je njeje dve pjesmi ča je ovu emotivnu večer učinilo još bogatejun i lipšun.
I tako je ova knjiga prnesla još jedno: " Da se ne pozabi" med već raneje izdane na našoj čakavice.
Slavica Car
Fotografije: Slavko Matejčić