2 - Pradjedovski dom mojih Merikani
Kad san čera videl osmrtnicu va koj je pisalo da će se na groblju Sv. Ane va Grižah obavit sprogod z Kanade prenesenih posmrtnih ostatki muža i žene ki su želeli svoj mir nać va Staron Kraju stislo me je va grlu i tuga me je obajela.
Pred očmi mi je prošla kolona tužnih i nevoljnih ljudi z hartunskimi kuferi va kih nose ono malo sirotinje ča su zeli z rodne kuće va koj su, va suzah, ostavili ćaću, mater, ženu i dicu i gredu na vapor ki će jih otpeljat tamo kadi misle da teče med i mliko. Ma tamo kamo su prišli ni bilo ni meda ni mlika, samo trdo delo va rudniku, ili delo koga niki drugi ni otel delat, od škura do škura i život va smrdljivih barakah z mnoštvon sebi sličnih supatniki.
Kuliko je samo istine va pjesnikovih versih kad poziva:
Ostajte ovdje, sunce tuđeg neba,
Neće vas grijat ko što ovdje grije;
Grki su tamo zalogaji hljeba,
Gdje svoga nema i gdje brata nije.
Malo je familij va Triblju i Vinodolu ke nimaju svoga bližnjega va voj koloni ča bez prestanka prohaja pred manun. Va toj koloni su bili i dva strica od mojega ćaće ki su šli va Sant Lojz, moj Ćaćastari i ujac ki su finili va Teploj Meriki, ali i niz meni poznatih i nepoznatih susedi i prijateli ki su se rasuli po celon svitu.
S tun kolonun je prošlo va zadnje vrime još dvajsetak mladih ljudi s Triblja (a naša Općina ruši pa zije dičji vrtići i stadioni, mesto da ulaže va radna mesta ), pa tako samo još nada da te se vrnut nazad drži na žitku njihovih najbližih.
A imaju puno više razlogi za vratit se nego za ostat tamo kamo su šli aš ako je zarada tamo i veća i stroški su tamo za tuliko veći, a va Domovini, ako je i malo manje meda i mlika, jin je i srce i duša.
Zato neka se vrate, samo trebaju savladat ponos ki jin pači da priznaju da su pogrešili, kad su dokončali ća proć z domi, pa će se vratit, jer ko ča je rekal moj ćaća – pod svojun voltun se najslaje smije i najlaglje plače.
Nikuliko let za redon su dohajali va Stari Kraj i va moju obitelj potomki od Ćaćinih stricih pa san po njihovih besedah zaključil da va toj Meriki ti moji rođaki nisu postigli niš više nego ča bi postigli da ovdi žive, a da su tu delali tako puno ko ča tamo moraju, postigli bi još i više.
Kad su se rođaki vratili va Meriku zeli su sobun komad žlipca i ruzinavu laticu za mliko ča su našli na mirišću pradjedovske kuće. Tu ruzinavu laticu i komad žlipca, rekli su kasnije, drže na počasnon mestu va svojoj merikanskoj kući ko spomen na svoji pretki. Ćaćini strici su svoje veliko domotužje ostavili va nasljeđe svojin potomkon da baren oni mesto njih vide njihov rodni Dom, selo kadi su se rodili i gromače po kih su se prtili.
Sliku mirišća njihove kuće vidite va prilogu, a takovih mirišć je va mojen selu deset od ukupno trejset kuć s tin da je još osan kuć prazno ili prodano. To su rezultati egzodusa ki traje već više od 120 let ,ali ki će ubrzo prestat aš domaćih ljudi skoro više ni.
Va prilogu vidite i sliku novinske reportaže z beogradskoga NIN-a (akreditiv va ambasadi je mogal va to vrime dobit samo srpski novinar, marako su va Chileu samo Hrvati pa je tekst na ćirilici) o nostalgiji moga Ćaćestaroga Roka Matića ki se va devedeset i drugon letu žitka želel vratit doma i umrit va rodnon kraju, pa je prišal va ambasadu obnovit još austrougarsku putovnicu.
Nažalost, povratak mu se mu se ni ostvaril pa tako moja mama Ana ni upoznala svoga oca ki je šal trbuhon za kruhon prije nego se je ona rodila. Ni ja svoga Ćaćustaroga.
Zato san bil posebno ganut kad san va osmrtnici, ka je povod za ovajsti napis, pročital da dica ispunjavaju želju svojih roditeljih, ku oni nisu mogli za svoga žitka ostvarit, a to je da vječno počivaju i najdu svoj mir na griškon groblju Sv. Ana, va hladu stoljetnih hrastovih stabal njihove mladosti i tako ostvare, baren mrtvi, svoj životni nedosanjani san.
Čin ove dice, Ljudi (z velimi slovi) zaslužuje najveće priznanje sakoga čovika, a posebno onojstoga ki voli svoj kraj, svoji ljudi i svoju mater i oca.
„Domovino , ti si kao zdravlje “ rekao je Jura, legao na slamu i ispustio dušu - opisal je poznati književnik povratak z tujine, telon i dušon, bolnog čovika ki se je rastal sa životon va štali na slami jer va njegovoj rodnoj kući za njega ni bilo mesta.
Va njegovu kuću su prišli niki stranjski ljudi, a to se danas i poli nas dogaja.
Tribalj, 9. 8. 2019.
Žarko Gašparović Markun
