Gredu dani jenara kot da mu se preši čin preja odbrojit do kraja miseca.
Nismo se ni obrnuli a već smo prišli febraju bliže. Vavik se misli kako će prvi bit dugačak i rastegnjen, a pasuje tako prešno. Zazimelo je, strašili su nas zi televizije, kako će nan bit jaka zima ča se j' pokazalo netočno, aš smo imeli više kiše nego snega. Već letami zapisujen dani od sv. Lucije do Božića ča čini dvanajst dani i kaže kakovo vrime bi moglo bit tokon leta, tokon dvanajst miseci. Va Gorsken kotaru, Lokvami, domaći načine i svoj godišnji pučki lokvarski kalendar, ki ovo leto kaže: Jenaro ili pak siječanj će bit hladan, vedar i vetrovit misec. Nakon dvajsetoga, moguće su magli, inje, poledice i mraz, pa čak i snjegovito.
Za febraj se ne zna. Maškare te pomest zadnji mrazi, duraju ovo leto do 14. febraja kada nakon Pepelnice gremo va mirneji del života.
Va ovi dva miseca poznate su i vele mrzlini, sneg i veli minusi va temperaturah. Jake i orkanske buri. Poznati su i mrzli muži ko ča je sveti Anton zimski, sveti Vinko, Vincekovo kad se blagoslivlju trsi, za rodno leto i dobro vino. Drugoga febraja pride Majka Božja kendelora - Svećnica - zima fora se do mora, ča bi reć zima j' pasala, ma j' tretega prišal sveti Blaž, pa j' rekal da j' laž, za njen sveta Kristina pa j' rekla da j' istina. To su se pučke sentence pa ki veruje , neka mu bude. Se više meterologi rabi stari kalendari i izreke aš se puno toga i ostvari.
Kako se pokaže zraka sunca, stepli na čas zemljicu, pokazali su se beli zvončići visibab zabelili se spod travice uz potočići okolo Kamenjaka, kamo smo jih užali poć pobirat. Složene bokašca prodaje i jedna placarica i nuti po deset kun. Ma škoda jih je bilo pokidat, a tako jih je lipo videt va vazicah. Uz strani Antova već se naziru pupići jagorčevini . Već su se pokazale sramežljive fijolice, ko lipe plave oči divojčice skrivene spod kakoveh osušeneh gran, ili špijajuć zi suhora. Ma lipota jedna. Se se j' zmešalo i malo uranilo.
Se mi se para, da te ovo leto malo ozest, da te se još pred snegon skrit do marča počekat. Kako će se to prešno pasat, maškare te finit. Prit će Pepelnica, za pokoru ćemo se popelon posut, a va Korizme ćemo postit i ko janjčići utihnut do Cvetnice i Vazma. Leti vrime ko pere, dan za danon se duže je danje svetlo. Steplit će nas marčeno sunce, zitirat van va polja i njivi. Priroda će se zbudit zi zimskoga sna a tičice će svojen kanton drugačije vrsadi parićat.
Teče vrime, listi kalendara obrću se ko kolo, lete leta a mladost začas mine. Ko i va prirode tako i va čoviku ko na rozariju prebirajuć očenaše, vrime gre, neumitno gre, jagmimo se za dobren, za bogatijen, pozabimo da zaprave rabimo malo, jušto tuliko ča va šaku stane, zato se veselimo sitnicami, aš život je kratak.
Užijmo još malo va maškarah, ki more neka gre.