U svojoj je arhivi Slavko Matejčić, vrlo dobar poznavatelj povijesti Crikvenice i okolice pronašao jedan zanimljiv tekst Tee Matejčić Jerić [1] o crikveničkom mesopustu i Meriku.
Premda tekst nije potpisan, po stilu pisanja, da se zaključiti da je ona autorica. U nastavku ga prenosimo integralno u cijelosti.
- Saki narod se more najbolje prepoznat po tomu ki su običaji sobun prnesli i otkuda su prišli, aš to stvara jedan određeni narod. To su običaji kod rođenja, ženidbe i smrti.
Jedan od običaji je i mesopust, ali on ni posebnost samo ovoga naroda ovde, nego je to običaj sih ljudi ki su živeli na sjevernoj hemisfere ove kugle zemaljske i to zato aš su ljudi živeli vječno va strahu dal’ će se sunce opet vratit nazad. Kada sunce pride na najnižu točku horizonta onda je to bil moment va komu su si živeli va strahu dal će se to sunce nanovo vratit nazad ili ne. Dal’ će ono opet prešit naprvo ili će nestat. Taj strah je zapravo bil glavna motivacija za njihovo ponašanje i za stvaranje običaji. A taj običaj mesopusta je nastal upravo zi jedne magijske formule dozivanja sunca odnosno tiranja zloga duha zime i mraka. Aš mrak i zima su bili zloduh, a sunce i teplina od koga se raste i nanovo dolazi život - to je dobri duh.
Prije nego ča su došli na Jadransko more, Hrvati su imeli dualističko vjerovanje, tj. vjerovali su va Boga sunca i va Boga tmine - Boga beloga i Boga črnoga. Tako su česta imena mest bila Belgrad (mi ga imamo va Vinodolu), a to je grad va kome žive Dobro. I sad - taj mesopust je trebal imet značenje da nas oslobodi od Boga tmine i da gremo va Božanstvo sunca. To se dozivalo na razni načini i od njih je do dana današnjega do nas došlo da se ljudi maškaraju. Tako se i ljudi va Crikvenice sako leto maškaraju i gredu va maškarane povorki, a crikvenički mesopust se zove Meriko.
Kako si znaju, Mesopust je bil od vaveki ali j´ siguro da se ni zval Meriko aš morda ni ni imel nikakovoga imena. Mesopust, i bog. Ali onda su bile va mode svete imena zi kalendara pa su se muški zvali Paškvalin, Bonaventura, Bernardo, Meriko, Mikula, Kalištro, Ernešto i se tako. I tako j´ bila jedna naša ženska ka j´ imela muža ki se j´ zval Meriko. A ona j´ bila evako ženska ka j´ malo volela popit i veselit se. A on je bil čovik ki j´ hodil po delu sakuda kako bimo mi danaska rekli da j´ bil gastarbajter.
I onda se j´ tako trefilo za nevolju da j´ Meriko prišal doma bolan i da j´ umrl, a baš je bil zadnji dan mesopusta. A njegova žena ka se j´ volela veselit ni mogla zdržat da ne gre va maškare, pa j´plačuć tobože za mužen Merikon hodila za Mesopuston i plakala "Meriko moj, Meriko moj". I tako j´ to zavaveki poli nas ostalo. Mesopust se more zvat kako će, ali onisti ki za njen plače, samo zija "Meriko moj". I niš drugo. More nabrajat se ča će mu falet kada Merika više ne bude, aš to j´ delala i ta njegova žena, tako govore, da j´ se to tako bilo.
A šentenca. To j´ malo druga stvar. Zna se ča j´ šentenca. Nekako to j´ se ono ča se od Mesopusta dogodi, o čemu se pripoveda i govori podotaj a onda kada pride Mesopust moreš va šentence se to reć naglas aš to nisi rekal ni ti ni ona, nego j´ to rekal Meriko. A Meriko se to more reć. On je jedini komu se niš ne sme i ne more zamerit. Ča ćeš mu zamerit kada ga ni. Važgu ga i parti. Do drugoga leta moraš jopet čekat da moreš ludet i govorit i delat ča ćeš i niki ti niš ne more.
To mu pride kako današnji moderni kauč poli psihijatra. Tamo greš pa govoriš ča te muči pa ti onda dohtor masno naplati i još ti morda reče da ti za zdravlje treba poć skijat va Tatre ili igrat tenis va Umag ili teć ili nerat. Ča bilo. Samo neka puno košta. Onda se zoten čovik žbufa i bude mu laglje. Negda se j´ hodilo kopat. I veslat. Pa bi od te vele muki i dela valje pasale se fandonije.
Ali danaska su druge vrimena. Ča ćeš ti danaska nekomu govorit kako j´ negda bilo. To niki ne želi čut. Samo naprvo. Kamo, to ni važno, ali naprvo. Morda j´ zada kantuna oštri zavoj pa letiš zi cesti i finiš na cimiteru, ali samo naprvo. I tako će naš Meriko isto tako moderno napisat šentencu siguro na kompjuteru (aš na šrajbmašine je to starinski), a morda najde i kakov kompjuter ki već ima va programu i šentencu i se, pa samo promeniš imena. Ki zna. Danaska j´ se moguće ...
-------------------------------------------------------
[1] Timoteja Tea Matejčić Jerić (1932.-2010.) crikvenička kulturna i turistička djelatnica, prevoditeljica i pjesnikinja, čuvarica zavičajne povijesti i običaja, prva predsjednica Katedre čakavskog Sabora “Kotor”