Vrime je od maškar. Počelo je prošlu šetemanu dizanjen zastavi crkveniškeh maškar va Matkovićeh. Skupili su se Matkovićari i uz larmu lupanja po bubnjeh zbudili oni kraj već pomalo zaspal va sagdanji život nakon blagdani. Zasopla j' Vičićeva i Babićeva harmunika, zazvonile čineli od Šulca, zišal je na raskrižje vas štiman vođa Matkovićari, Ivica Devčić - Deva, dočekeval gosti zi Selac, Bribira, Gornjega kraja, Dugi, i griško - belgrackoga kraja.
Cela križica ljudi i žen, motrila je ki je se totu i ki još fali. Kuhal sej' maškarani fažol, Mirjana Klementova je nutila slašćice. Sad je se puno mlajeh, nekeh stareh maškaroni više ni, a smjena generacij nosi svoje. Već su med njimi i pravnuki od onesteh, keh više ni.
Vavik je bilo pitanje seh pitanj - kade su koreni maškaranja va Crkvenice. Neki tvrde da je Gornji kraj, Benići i Petak, neki da su Matkovići. Ja bi reć i od jednoga i drugoga rajona vavik je bilo ljudi ki su bili kolovođe, a za njimi sej' priklonil oni ki je maškare volel.
Va Gornjen kraju va tadašnjoj birtije, skupljali su se ljudi okolo poznateh tamburaši i armunikaši Jačice, Joška i Lukića Župana, šnajdari Joška Antića i Davida, malo mlajega Filice. Kada bi oni krenuli kantajuć put cirkula va Crkvenice, zi sake bi se familje pripetale ili ženi ili muži grdo omaškarani. Muži znopak okrenute stare jaketi, stare brageše i najstariji postoli, rada su se i va ženski šlafroki i halje obučevali, zastrli lica koltrinami ili nagaravili obrazi karbunon. Vukli su za sobun stare ruzinave lati navrezane na špagi da bi čin više bučili. Poklopci za padeli je bilo najjače čut. Ženi su jih ščekevale spred vrat ili na lesah kuhanen vinon, nutile rakijun, fritami i puhancami. Već do mosta jih je bila kolona. Nogi su njin već pomalo saka na svoju klatile, vino je delalo svoje. Klobuki i kapi se nakrivile a kanat za kanton se lipši. „Ako se želiš zabavit poć moraš poć va Gornji kraj, tamo će Joško i Lukić mlad zapivat Crikvenice raj“ ... napisal je kašnje za spomen njimi Marijan Margitić a kantal Marino Ferenčić.
Na Petaku bi njin se pripetili Ivo Matejčić harmonikaš, i ženske Neda Birko, Bosiljka Matejčić , Marija Matejčić - Kožinka. Već su jih pod murvicun čekali Matkovićari. Marijan Košuljandić, zvani Košulja, Mato Veljačić - stolar, Ivan Pahlić i njegova Vera, Svemila i Ivana, zi Spojamani Kneževići, Žvrki, Pavina i onako veseli već bi bili tancali i kantali, dok se vino natakalo zi barilci, ribari bi nutili frigani ili slani sardeli. Ni bilo četrtka i nedelje kad se nisu totu jatili. Maski nisu imeli, ma sača bi bili nase nakramali, bršljana, traturi, sakakoveh štrumenti, lonci i padelic po kemi bi kuhačami lupali. Ni jih bilo za poznat. Grlili su se i jedan drugoga pod ruki ćapevali i kolo ili polku tancali.
Zi Kali bi se spušćevali Poldo, Vera Pura, Pekovica, Zondinka, Božo Car zvani Božo Žaba i njegov brat Emerik, i tada još mladi deški dobri kanturi, Kalumica, brati Rino i Mile Car zvani Dora, Mladen Car - Pavina. Ivo Guslan je bil poznati harmunikaš i veseljak ko i Škiljan - Brico. Kanturi i dobreh guti bilo je fanj. Ivo i Nikica - Kostrenčić- Kacaci, tamburali su klateć se zi Vrtne. Tada još mladi deški brati Stojčići - Jelani, si šesni stason i slavujići glason.
Kanat za kanton, nazdravljanje, veselje...
IHUHU - zijale su vesele ženske, tancajuć med sobun, pušćale bi doma noni da dečinu čuvaju a one bi malo na brigi i delo pozabile i rada va maškare šle. Muži su njin tamo bili, ma jih nisu prepoznali kako su bile ošmutane. Znalo je bit zima, bura je nosila se pred sobun, švigalo je mrzlo jugo z kišun, skrili bi se va gostionu „Galeb“ ili „Koreju“, ma volja ni popušćala.
Murvica pameti puno toga ča sej' spod nje dogajalo. I njeje bi se gole i grbave grani po taktu muziki na bure klatile. Niki nikoga ni grdo gljedal aš jih je ljubav za maškare teplila i veževala. I oni susedi ki su pokarani bili, skupa bi nazdravljali, drugi dan se jopet nisu gljedali. Dečina su se va to vrime rivali okol njih, pametili saki mot i kanat. Kad bi nihovo vrime prišlo da moru va maškare poć, zeli bi si ko zadaću da se užanca ne sme zatrt i šli bi dalje. Malo drugčiji, mlaji i moderneji ma srce i ljubav za maškare ista ...
„Maškare ča moru maškare“ ... bi kantali i Crkvenicun klatili.
O tomu va Maškaranen vremeplovu - drugi put.
Maškare traju devet šeteman, najdulje su, bit će materijala za pisanje.
