Na kalendaru zadnji dva dani, gre vrime, gre. Leta se slažu, delamo inventuru, pasuju sliki pred očami ko da gljedamo neki lipi film. Krasan dan, prohladan va svečarsko ruho obučen, zeknja po dućaneh. Si nekamo preše, na pasaju si zažele sako dobro va noven letu ča bati na vrata.
Crkvenica ozebla tepli se na škrtemi zrakami sunca, more je mirno, barki va portu ko va gvardije vezane za mrgilji, va zimsken snu odmaraju. Sunce polešto grije trg , lipi adventski venac i jelvicu. Samo nekuliko dečice teče trgon zabundano, čine sliku tako lipun ko za ansis kartu. Rumene njin lišca šćiplje mrzla arija. Oci teku za njimi, a oni vrišću i veselo se smeju.
Večeras će bit veselo, čeka se staro leto. Neke nove modi ma neka se ljudi vesele, pogotovo mladost. Va mrzloj arije se ipak ćuti dobra volja, dobre želje, radost je na liceh, pratimo još jedno leto ma kakovo bilo, broje se ure zadnjeh dani. Va srcu nada za bolje novo ko nan gre. Pušćat te se baloni vajer, prama nebu. Saki balon svoja želja, neka se semi ispune.
Pasujuć uz kuće arija zadiši na sarmu, pečenoga odojka. Užurbane su pripreme za doček, niš ne sme prefalit. Bogata ponuda će bit na stoleh. Dari su spravni pod jelvice, nekomu skroman nekomu bogat, se ovisi kuliko je žep dubok. Ako niš bit će neka sitnica za najmlajeh.
Lipe su to užance, ma najdraže je bilo dobit za dobru ruku. Spametin se kako smo hodili na mlado leto čestitat po kućah. Rodbine, susedami, nosili smo najveću jabukvu ku smo doma imeli, a va nju bi gospodar zataknul sitni soldi, neki dinar, neki dva. Kako smo se veselili, kad bi doma prišli i brojili soldi. Dali bimo matere da nan spravi pa će se kupit kakova olovka ili bojice za školu. Danas se dobra ruka pripravi za vnuki, sakomu isto, ali harteni, nekomu 50 nekomu 100 kun, kuliko ki more dat. E to se onda skrije negde va tajnu škatuljicu pa se ima kroz leto za poć va kino, kupit kakovu sitnicu, već ča rabi.
Va kućah se uža kantat ona stara:
Narančice, jabučice, na dobro van mlado leto došlo.
Pa neka nan pride, prnese se ča si želimo, zdravlja, ljubavi, sloge i sriće pune vriće.
Sretna nan nova, neka bude još bolja nego ova !