Vrime našega ditinjstva pamete neke stareje generacije, ko jedno posebe lipo doba puno igrarije va prirode, žitka uz prirodu i s prirodun. Dihali smo friški zrak ki je dohajal ozgora zi Planini kako smo zvali brda znad vinodolske kotlini. Zapal bi sneg va zapuheh i do pasa. Zimi su bile mrzle da bi se Potok bil ledil, a i more uz kraj paladi uz plićaki.
Po zime je mrzla bura nosila pahulji snega da si jih na obrazeh ćutil kot miće iglice, a lice bridelo od zimi. Ni materine teple rukavice spletene od ovčje vuni nisu puno štitile od mrzlini, ni kapi ni šali kada bi ozgora zapuhalo. Kad bi snežak zasul strani Kotora i Sopaljske, sakuda nas je bilo. Vukli bi nonovun rukun načinjene sanjki po ravneh umejkeh, po dvoru, a sneg je bil dvecav od našeh koraki i postoli.
Ni se jedanput dogodilo da bi brat, još ditetino, šmrkav do ust spušćal niz manju strminu i finil va diračju ko mu se našlo na putu. Grudali su se dečina delajuć grudvi ko va najvećoj batalje. Ni bilo važno pobjedit nego dobro zasut protivnika. Drknuli bi jedan drugoga va kup snega duron ga zasipljuć. Ma ni bilo mesta na hlačah i kakovoj starijoj jakete većoj nego je rabila bit, da se moglo podobuć, da ni bilo mokro i mrzlo. Divojčice su se više zabavljale okolo tekuć ili delajuć snješka. Nonina stara padelica na glavu, namesto nosa merlin, a namesto oč i ust komadići karbuna. Puci od kamičići, mesto ruk grani od šedrki. Tako bi se bile veselile kada bi ga finile, pa tancale okol njega.
Va vrime kada je bilo snega prišli bi se sklizuć zi školi po uglancanen ledu na cestah, hitili bi torbu za vrata, na su žbrulju pojili obed a onda van. Sipil bi sitan snežak i slagal sloj na sloj kot mali tepišići. Zavališ se va njega na pleća, mašeš rukami kot da letiš a kad se digneš vidiš anjela, to su bile sliki va snegu. Kad bi se dečine prikrpali pasi sneg je pršćal se okolo nošen vetron. Drsat se saonicami niz brig moralo sej' čekat na red. Ni jih saki imel. Strpno bi čekali na svoju turu i tri spusti uživancije.
Zimski su dani kratki, noć mrzla da se dah ledi, mat nas je nazivala va teplo. Još bi se va hodniku zuvali, a sneg i led se cedil po podu. Va rolu od šparheta mat bi klala nekuliko puneh cigal, omotala bi jih starun krpun da se moru mrzle nogi steplit. Okol šparheta visele su mokre kalceti i roba, dičina bi se teplila okolo šparheta i pila tepli lipov čaj. Dečjoj radoste ni bilo kraja.
Vrimena se menjaju, ni više takoveh mrzleh zim, mesto kraja leta prišla je rana jesen, namesto zimi rano proliće a taman propupale i oprle cveti menduli i cibori, ošinula je zima. Prognoza se okrenula znopak pa je tek sada dobro zasulo snegon Gorski kotar, dečina i familje gredu na skijanje na Platak, a okolo Grižan napadal sneg.
Ni jedno leto ni prošlo brez njega, pa neće ni ovosto.